Lezo Institutuak anfibioentzako urmaela egin nahi du Altamiran
Eremu publikoan egingo denez, Altamirako auzotarrei informazioa eman nahi diete, eta izan ditzaketen kezka eta zalantzak argitzeko.
Gisa honetako urmaela da Altamiran egin asmo dutena. Lezo Institutuaren asmoa da Altamira parkeko eremu publikoan anfibioentzako urmaela egitea, duten egoitzatik gertu. Hala izanik, bai hezkuntza zentroak zein Lezoko Udalak egoki ikusi dute egitasmoaren nondik norakoak auzokideekin partekatzea, “sor daitezkeen zalantzak eta kezkak argitzeko”. Hori horrela, batzarrera deitu dituzte altamirarrak: hilaren 5ean (osteguna) nahi diete egitasmoaren berri eman, 18:30ean, Lezo Institutuan bertan.
Urmaelaren egitasmoa Aranzadi Zientzia Elkarteak bultzatutako Eskoletako Urmael Sarea proiektuaren barruan ulertu behar da. Eskola inguruan urmaela edo putzua duten eta eremu hori erabilera didaktikorako erabiltzen duten Euskal Herriko ikastetxeen sarea da. Bere helburu nagusia da eskola horien arteko lotura sustatzea, eta esperientziak partekatzeko aukera eskaintzea.
Eskoletan urmaelak sortzeko ideia Alemaniatik ekarri zuen Aranzadi Zientzia Elkarteko Herpetologia sailak, horiek egitea ingurumenaren eta biodibertsitatearen aldeko pauso garrantzitsua ematea delakoan. “Urmaelak hezkuntzan ekosistemaren eredu bilaka daitezke eskola inguruko eremuan, funtzionamendu ekologikoaren inguruko kontaktu zuzena ahalbidetzen duten ikerketa eta behaketa jarduera ezberdinak egiteko”, azaldu dute udaletik.
