Pasaia tentsio handiko eremu izendatzea eskatuko du udalbatzak
EH Bildu, PSE-EE eta Podemos alderdien aldeko bozkekin eta EAJren abstentzioarekin egin du aurrera mozioak.
Azken plenora bertaratu ziren STOP Kaleratzeak taldeko zenbait kide. 
Azken udalbatzarrean eztabaidatu zuten Pasaiako kargudunek STOP Kaleratzeak taldearen mozioa, Pasaian tenkatutako eremuak zehazteari buruzkoa. EH Bilduren, PSE-EEren eta Ahal Dugu Podemosen aldeko botoekin egin zuen aurrera eskaerak, eta EAJren abstentzioarekin.
Talde eskatzaileko kideak pleno aretora bertaratu ziren joan den asteartean, euren mozioaren gaineko erabakiaren berri bertatik bertara izateko. Eurek emandako datuen arabera, 900dik gora pasaitar daude Etxebideren zerrendatan inskribatuta.
Familia horiek, batezbeste, 14.000 euro irabazten dituzte urtean, eta hileroko diru-sarreren %80 inguru inbertitu behar dute alokairua eta etxebizitza gastuak ordaindu ahal izateko. Izan ere, 1.000 euroen bueltan dago alokairua Pasaian.
Kolektibo zaurgarrienak diren horiez gain, badira erdi-mailako errentak dituzten bizilagun asko ere, eta horiek ere zailtasunak dituzte, egun, alokairuen merkatura sarbidea lortzeko. Horiek diru-sarreren %30-%40 inguru erabili behar dituzte hileroko errenta ordaindu ahal izateko.
Muturreko egoera horien ondorioz, geroz eta gehiago dira alokairuak ez ordaintzeagatik agintzen diren etxegabetzeak.
Tenkatutako zonalde izatearen inplikazioak
Maiatzean argitaratutako Etxebizitza Legea indarrean da, eta horren 18. artikuluan dio tokiko udalek eskubidea dutela, udalbatzak hala erabakita, dagokien udalerria tenkatutako izendatzeko eskaera egiteko. Hala ebazten dutenek, beraz, Eusko Jaurlaritzari helaraziko diote eskaera euren udalerria tentsio handiko izenda dezan eta jarraian aipatuko diren neurriak sar daitezen indarrean.
Edukitzaile handien kasuan (bost etxebizitzatik gora dituztenak, garaje, trasteleku edo halakoak kontuan hartu gabe), tentsio handiko diren eremuetan aukera dago jabe horien alokairu tipoa merkatzeko. Jabe txikien kasuan (ugarienak), aukera legoke errentak izozteko, behin herriak tenkatutako izendapena jasota.
Baldintzak
Arestian aipaturiko neurriak indarrean sartu ahal izateko, bi baldintzatako bat bete behar ditu udalerriak. Edo bizilagunek euren diru-sarreren %30 baino gehiago alokairuak eta etxebizitza-gastuak ordaintzeko bideratzea; edota azken bost urtean bertako alokairuen prezioak KPIa baino hiru puntu gehiago igo izana.
Azterlana egin beharko du udalak bi baldintzetakoren bat betetzen dela frogatzeko, eta horrekin, eskaera bideratuko dio Eusko Jaurlaritzari Pasaia tentsio handiko eremu izenda dezan.
[Etxebizitzen auziari buruzko erreportajea publikatuko du HITZAk ostiral honetan, webgunean nahiz papereko edizioan].
