Eraso matxista Lezon
Piztu Lezok, Gaxuxak eta Iruntzenek deitu dute elkarretaratzea, eta udalak bat egin du. 19:30ean da, Gurutze Santuaren plazan.
Emakume bati eraso egin zion haren bikoteak Lezon larunbat gauean. Horren aurrean, Piztu Lezok, Iruntzen Emakume Taldeak. Gaxuxa Emakumeen Elkarteak eta Lezoko Udalak ohar bateratua plazaratu dute. Gainera, erasoa kalean salatzeko deia luzatu dute: ostegunean (hilaren 5ean) elkarretaratzera deitu dituzte lezoarrak, 19:30ean, Gurutze Santuaren plazan. Erasoa jasan duen emakumeari eta haren inguru hurbilari elkartasunik beroena adierazi diete herriko eragileek, eta lanean tinko jarraitzeko konpromisoa berretsi dute, “zubiak eta sareak eraikitzeko eta jendartean indarkeria matxistari lekurik ez uzteko”.
Irmo gaitzetsi dute udal erakundeak eta herriko eragileek erasoa. “Halako portaerak Emakumeen Giza Eskubideen urratze larriak dira: diskriminatua ez izateko, ongizaterako, integritaterako eta duintasunean eta askatasunean bizitzeko eskubidearen aurkako erasoak, besteak beste”, esan dute. Hala, indarkeria matxista “jendartean nagusi den genero ezberdintasunaren adierazpen mespretxugarriena” dela adierazi dute, “eta lerro hauek sinatu ditugunok erabateko ezezkoa, ezezko biribila esaten diogu horri”.
Eraso matxistaren aurrean eragile sozial, politiko eta erakundeen ardura pertsonal eta kolektiboa funtsezkoa dela azaldu dute Lezoko eragileek, eta apustu ausart eta sakonak behar direla “hitzetatik praktikara pasatzeko, hau da, oldarkeria behin betiko desagerrarazteko”. Bide horretan, indarkeria matxista lehen mailako auzi politiko izan behar dela nabarmendu dute, eta beharrezkoa dela “konplizeak bazter uztea eta bizi garen antolaketa sozial sexista deseraikitzeko berdintasun politika sendoen alde” apustu egitea.
