Areto futboleko derbia, Antxorentzat
Herriko bi taldeak ostiral gauean lehiatu ziren, Espainiar Estatuko Hirugarren Mailako hirugarren jardunaldian. 8-2 gailendu ziren etxekoak.
Antxo AF eta Donipari taldeetako jokalariak, elkarrekin. Joan den ostiralean, gaueko 22:00etan, areto futboleko herriko bi taldeen artekoa lehiatu zuten: Pasai Donibaneko kiroldegian elkartu ziren Antxo AF eta Donipari, Espainiar Estatuko Hirugarren Mailako hirugarren jardunaldiko puntuak poltsikoratzeko prest.
Partida hasi bezain pronto, Antxok gogor egin zuen presioa, eta atsedenaldia heldu zenerako 5-0 aurreratu zen markagailuan. Baloia lapurtu ondorengo jokaldietan heldu ziren lehen hiru golak.
Bigarren zatian, ordea, jokoa parekatu eta Doniparik bi gol eskuratu zituen. Antxok, baina, lanean jarraitu eta partida 8-2 bukatu zen, etxekoen alde. Hirutik hiru irabazita, bederatzi punturekin sailkapenaren gorenean da Antxo. Lau puntu eskuratu ditu oraingoz Doniparik, eta sailkapenaren erdialdean dago.
Kiroldegiko harmailak lepo bete ziren ostiral gauean, areto futbolak mugitzen duen jendea ez ezik, herriko derbiak sortzen duen grinaren seinale.
