Urriaren 16tik 29ra, Mugikortasun Jardunaldiak Trintxerpen
Hainbat ekimen antolatu ditu udalak Trintxerpeko Klub Atletikoarekin batera. Horien artean, bizikletan ikasten hasteko ikastaroa, bizikleta mantentzeko tailerra eta irteera.
Bizikletaren erabilera, mantentzea eta zirkulazioa. Hori erdiesteko, edo behintzat sustatzeko, Pasaiako Udalak eta Trintxerpeko Klub Atletikoak Mugikortasunaren Jardunaldiak antolatu dituzte, urriaren 16tik 29ra. Gaur egun bizikleta erabiltzeko oztopoak kendu nahi dituzte, eta pasaitarrei berau erabiltzeko erraztasunak eman.
Kontzientziazio ekimen gisa antolatu dituzte jardunaldiok, oinez eta garraio publikoan mugitzearen garrantzia azpimarratuko baitute. Hala, hainbat dira antolatuko dituzten ekimenak. Horietan guztietan izen ematea HAZ bulegoen bidez edo inprimaki hau beteta egingo da.
Batetik, helduentzat, bizikletan ikasten hasteko ikastaroa antolatuko dute. Bosgarren edizioa izango da aurtengoa, eta urriaren 16tik 27ra goizero Arenederreko pistetan eta Trintxerpeko frontoian elkartuko dira, 10:00etatik aurrera. Izen ematea doakoa bada ere, aurreko urteetan parte hartu ez duten 0 mailako pertsonek izango dute lehentasuna, eta plazak izena emandako hurrenkeraren arabera esleituko dira.
Bigarrenik, bizikletak mantentzeko oinarrizko tailerra egingo dute urriaren 28an, larunbatean. Araneder kirol guneko frontoi txikian egingo dute, goizeko 10:00etan hasita eta eguerdian bukatuta. Parte hartzaileek, beraz, bizikleta prest izateko oinarrizko lanak egiten ikasiko dute. Izen ematea, doakoa, hilaren 26ra arte egongo da zabalik. Plazak izen ematearen hurrenkeraren arabera esleituko dira.
Jardunaldien azken egunean, azkenik, bizikleta irteera egingo dute eskualdeko bidegorri saretik. Goizeko 10:00etan abiatuko da, San Pedroko frontoitik. Puntu horren eta Arditurriren arteko ibilbide zirkularra osatuko dute, eta geldialdiak egingo dituzte Trintxerpeko Correosen bulegoetan; Antxon, Nafarroa hiribidean; eta Errenteria-Oreretan, Zumardian. Tailerraren antzera, izen ematea, doakoa, hilaren 26ra arte egongo da zabalik. Plazak izen ematearen hurrenkeraren arabera esleituko dira ere. Norberak eraman beharko du bizikleta eta kaskoa, baita ura eta hamaiketakoa ere.
