Genero beltzean ere maisu da Legorburu
Krelia Vitoria-Negrasteiz ipuin lehiaketa irabazi du errenteriarrak, euskarazko atalean.
Legorburu saria eskutan duela. Askotariko genero eta estiloetan bikain moldatzen dela erakutsia du aspaldi Iñigo Legorburu errenteriarrak, baita ez dagoela ezinezko duen saririk. Horren erakusle asteburuan jaso duen saria, beste bat, honakoan genero beltza ardatz duen Krelia Vitoria-Negrasteiz ipuin lehiaketa irabazita euskara atalean.
Gibeletik lanarekin eskuratu du saria Legorburuk. “Hunkituta” azaldu da errenteriarra lorpenarekin, “batez ere umore beltzeko ipuin xelebre honekin irabazi izanagatik. Izan ere, ez dira asko Euskal Herrian antolatzen diren halako lehiaketak. Honakoa lehenengoa izanda, eta ohorea da lehena irabazi izana”.
Mendeku istorioa da errenteriarrak ondu duena lehiaketarako, biktima borrero bilakatuko den kontaketa. Protagonista, prostituziora eta drogetara bultzatu zuen nagusia hiltzen saiatuko da, tartean emakume izatetik gizon izateko trantsizioa egin du protagonistak, eta Hiesaz kutsatu ere prostituzioan aritu bitartean. Garai bateko bere borreroari HIESA kurtsatzea du helburu orain protagonistak.
Trama hori guztia gidatzen Legorburuk Jose Javier Abasolo idazle zendu berria jarri du: “Laguna nuen eta iazko maiatzean hil zen. Harreman polita nuen berekin, umoretsu eta jakituna zelako. Idazle handia zen, hogeitik gora nobela beltz idatzitakoa. Eta hortxe jarri dut mendekua gauzatzen den ohe ondoan protagonistak soilik ikusi dezakeela eta krimen perfektua gauzatzeko aholkuak emanez”.
Legorburuk 400 euroko saria eta jaialdiak ikur duen Poe katuaren egurrezko oroigarria jaso ditu.
Sari banaketa eginda, Kai Nakai artista gasteiztarrak hartu zuen oholtza.
