Aiton Bordako Batzorde Olinpikoa hilaren 16an bilduko da
Erretiratuen egoitzaren olinpiaden nondik norakoak azaltzeko egingo dute batzarra, Aiton Bordan bertan.
Olinpiaden irabazleentzako garaikurrak dira honakoak. Aurrera doaz Aiton Bordaren Olinpiadak. Horren harira, jolasetarako izena eman dutenei edo apuntatzeko nahi dutenei begirako batzarra egingo dute hilaren 16an (astelehena) Aiton Bordan bertan. 18:00etarako egin dute Batzorde Olinpikoa batzeko deialdia. Jada badituzte irabazleentzat garaikurrak. Artikulu honen lagun den irudikoak dira.
Bertan, besteak beste, olinpiaden bukaerako ekitaldiaren gainekoak azalduko dituzte. Abenduaren 15ean dute egitekoa (ostirala da) jolasen aroari agur esateko jarduera hori, baina ez da nolanahikoa izango: bazkari “berritzailea” egin nahi dute, zozketekin, eta aldi berean olinpiaden sarien banaketarekin.
Asteleheneko bilkuran beste gai bat izango dute aztertzeko: hilaren 27an Elizondora egitekoa duten txangoa, hango baserritarren produktu eta ganadu azokara (Donezteben bazkalduko dute).
