[Bideoa] Lobato eraisten hasi dira
Bertan bizi zirenek euren ondasun guztiak atera ondoren, Lobato Etxea eraisten hasi dira. Gaur bertan dira bukatzekoak lanak.
Goizean hustu, eta ondoren eraitsi. 11:30ak inguruan hasi dira makinak Lobato Etxea eraisteko lanekin. Litekeena da gaur bertan etxea zenean orubea gelditzea.
Lobaton bizi zirenek euren ondasunak bertatik atera dituzte goizean zehar. Izan dira euren furgonetetan gai horiek lekualdatzeko aukera izan dutenak. Bestelako objektu eta altzariak, berriz, etxearen ondoan utzi dituzte. Horiek Lezoko Udaleko Brigadak jaso ditu, udal pabiloi batean behin-behinean gordetzeko: jabeek horien bila joan behar dute. Hori egin ezean, eta egun tarte bat pasata ez badituzte erreklamatzen, birziklatzera eramango ditu Lezoko Udalak.
Etxean bizi zirenak, eta babesera joan zaizkienak, eraisketa bitartean bertan dira, etxearen alboan. HITZAri esandakoaren arabera, oraindik ez dute huste eta eraisteari aurre egiteko mobilizazio publikorik prestatu. “Hori bai, udalari erantzukizunak eskatuko dizkiogu”, adierazi dute. “Bat-batekoa izan da dena. Ez genuen espero. Ez digute abisurik ere eman. Hau ez da onargarria. Horrelako espazio bat besterik gabe deuseztea bidegabekeria da”, adierazi dute Lobatoko kideek.
Udalak, bere aldetik, berretsi du gaur baino lehen abiatutako bidea: Lezoko Udaleko Gizarte Zerbitzuetako baliabideak eskaini dizkiete etxebizitza eskubidea bermatzeko. Aldi berean, egungo Lezoko gobernu taldeko kideek uztailean adierazi zuten etxe okupatuaren gaia aurreko gobernu taldeak kudeatu zuela, eta egungoak indarrean diren epaitegien aginduak bete beharrean izan direla.
Udalaren azalpenak
Izan ere, Lobato Etxea aurri egoeran deklaratu zen 2023ko martxoan. Horren ondorioz, Donostiako Auzi Epaitegiak 2023ko ekainaren 27an helarazitako epai baten bitartez, uztailaren 27ra bitarteko epea eman zion Lezoko Udalari etxea husteko, “aurri egoera deklaratu zenetik aurrera, gerta zitekeen edozein ezbeharren erantzule Lezoko Udala eginez”, udalaren esanetan. Baldintza horiek ez ziren bete, eta uztailaren 26an Lezoko udaltzainak bertaratu zirenean, ateratzeari uko egin zioten. “Hurrengo egunean, Ertzaintza bertaratu zenean, berriz, eraikinaren teilatura igota, hustea oztopatu zuten. Egoera horretan, alde guztien segurtasuna bermatze aldera, hustea bertan behera uztea erabaki zen. Beraz, behin epemuga pasata, udaletik, etxea husteko epealdia luzatzeko eskaera bidali zen epaitegira”. Horren erantzuna hilaren 4an iritsi zen Lezoko Udalera, eta berriro, hilabeteko epea eman zitzaion Lezoko Udalari etxea husteko”. Gaur goizean egikaritu da.
Jarraian, HITZAren jarraitzaile batek hedabide honetara bidalitako bideoa.
