Musika bandaren kontzertua Cristobal Gamonen 50. urteurrenaren harira
Igandean izango da kontzertua Cristobal Gamongo ikastetxearen jolastoki estalian.
EMKE Bandak bat egin du Cristobal Gamon ikastetxearen 50. urteurrenaren ospakizun ekitaldiekin, eta horren harira kontzertua egingo du igandean ikastetxearen jolastoki estalian. Banda osatzen duten 60 musikarik hartuko dute parte 12:30ean hasiko den kontzertuan.
Emanaldiak helburu bikoitza duela esan dute EMKEko arduradunek: “Merezitako omenaldia eskaintzea 50. urteurrena ospatzea ahalbidetu duten ikasle, irakasle eta gurasoei, bide luze honetan komunitateak egindako lana bistaratzeko. Bestetik, musika bandak herrian betetzen duen funtzio sozialean sakontzen jarraitzea kultura eta hezkuntza sarea osatzen duten eragileekin lankidetzan arituz”.
Alain Aierdi Gurpegik zuzenduko du kontzertua, eta besteak beste Peñafielen Los Conformes jai giroko obra alaia, Melvin Sheltonen Basque Rhapsody, Alain Irwinen A Disney Spectacular, edota Guy Ruperten Coldplay on stage joko dituzte, “askotariko kontzertu egitaraua, publiko zabalari zuzendua”.
Kontzertura bertaratzera deitu ditu herritarrak EMKEk.
