Musika eskola zaharberritzen ari dira
Aste honetan kanpoaldeko lanak egiten ari dira. Barnealdean ere hainbat egokitze lan egin dituzte aurretik.
Tomas Garbizu Lezoko Udalaren Musika Eskolaren eraikina zaharberritzen ari dira, kanpoaldea batik bat. Hala, aste honetan teilatuko hegalean hainbat konponketa egiten ari dira beharginak, eta ondoren margoketari ekingo diote. Horrez gain, eskolako zuzendari Xanti Espinak baikor adierazi du azken asteetan «inbertsio handiak» egiten ari dela udala Arretxene eta Zubitxo kaleen artekoan dagoen kultur hezkuntza azpiegituran: “Leihoak eta ateak berritu ditugu, informatika sare berria dugu, eta informatikako gailu guztientzat gela bat egokitu dugu”.
Udalak jakinarazi du aste honetan direla bukatzekoak eraikinaren kanpoaldeko lanak. Segurtasun neurriak medio, ingurua hesitu dute eta eskolaren erabiltzaileek nahiz herritarrek oro har ezin izan dute ingurua osotasunean erabili. Horregatik, sor daitezkeen eragozpenengatik barkamena eskatu du Lezoko Udalak.
