'Hitz egin dezagun... ' zikloan, heriotzaz
Bihar abiatuko dute iniziatibaren lehen zikloa Lekuona Fabrikan. Heriotzaz hitz egiteko lau jarduera proposatu dituzte.
Naroa Martinez jardueretan arituko den adituetako bat. Psikopedagogoa da. Hitz egiteko zailak izan daitezkeen gaiak ikuspegi anitzetatik heldu, eta parte hartzaileei haien gainean hitz egiteko aukera ematea du helburu Hitz egin dezagun… zikloak. Bihar abiatuko dute, eta lau jardueren bidez, heriotza jarriko dute mahai gainean. “Ezinbestean bizitzaren zati bat osatzen duen alderdia izanik, beste pertsona batzuekin hitz egiteko eta partekatzeko zaila egiten den gaia da”, esan dute antolatzaileek.
Lau ikuspuntutatik landuko dute gaia, horretarako lau saio antolatuta. Lekuona Fabrikan izango dira denak, 18:30ean hasita. Parte hartzeko ez da izena ematerik egin behar.
Dolu perinatala. Gure hildakoak familian oroitzen izango da lehen saioa; bihar egingo dute. Sihara Nuño idazlea eta Naroa Martinez Suarezek, galeren, heriotzaren eta doluaren pedagogian espezializatuak dinamizatuta. Gaztelaniaz izango da saioa.
Bizi testamentua izango dute hizpide bigarren jardueran. Hilaren 24an, asteartea, izango da hori. DHE Duintasunez Hiltzeko Eskubidea elkarteak heriotza nola izatea nahi dugun aukeratzeko moduak badaudela azalduko dute. Elebitan izango da hitzaldia.
Heriotza eta dolua Haur Hezkuntzan… eta literaturan landuko dute hilaren 26an, osteguna. Txabi Arnal Gil EHU Euskal Herriko Unibertsitateko irakaslea eta idazlearen eskutik, heriotza eta dolua umearen heziketaren parte izatearen garrantziaz hausnartuko dute. Euskaraz izango da saioa.
Azken saioa berezia izango da, hilaren 31n egingo dute Gau beltza. Zatoz lagunekin beldurra pasatzera goiburuarekin.
12 eta 16 urte arteko gazteek, taldeka, asmakizunez, erronkez eta mahai jokoez osatutako pista jolasa egingo dute.
