Klima aldaketari aurre egiteko neurri sorta proposatu du PSE-EEk
Aterpe klimatikoak sortu, espazio publikoen birnaturalizazioa, eta eremu berdeak sustatzea aipatu ditu besteak beste erregistratu duten mozioan.
Aldaketa klimatikoa. Klima aldaketarekin kezka azaldu du PSE-EEk, eta horren harira, horri tokian eragiteko neurri sorta proposatu eta mozio gisa aurkeztu udalean. “Gizarte gisa aurrean dugun erronkarik garrantzitsuena” da klima aldaketarena Isaac Palencia alderdi sozialistaren bozeramailearen esanetan, “bero boladak gero eta bortitzagoak eta ohikoagoak dira. herritarren bizi kalitatean eta osasunean duten eragina ukagaitza da. Horregatik aurkeztu dugu mozioa, erronka honi tokian tokitik erantzuteko”.
Mozioak neurri zehatzak proposatu ditu. Azpiegitura berdeen ikerketa da lehena. Horren barruan azterketa zehatza egitea eskatu du udalerriak benetan duen azpiegitura berdea aztertzeko.
Aterpe klimatikoen sorrera da planteatu duen beste neurrietako bat: “Udalari eskatu diogu bero boladei aurre egiteko aterpe klimatiko bilakatu daitezkeen eta tenperatura egokiak bermatuko dituzten espazio ireki zein itxiak identifikatzea”.
Eremuen berdetzea ere eskatu du PSE-EEk. Eguzkitik babesteko zuhaitzik ez duten hiri eremuetan landaredia ugaritzea eskatu du, eta gauza bera, grisak diren eremuetan. Amaitzeko, espazio publikoen eraldaketa proposatu dute sozialistek mozio horretan, “ikastetxeetako jolastokietan estalpeak egiten jarraitzeko eskatu diogu udalari, baita herriko plazetan ere, espazio inklusiboagoak, iraunkorragoak eta naturalizatuagoak izan daitezen”.
Alderdi sozialistak mozioa hurrengo plenoan eztabaidatu eta “onartuko” den esperantza azaldu du azkenik, “bertan proposatutako neurriekin Errenteria iraunkorragoa izango delako, eta prestatuago egongo delako klima aldaketatik eratorritako erronkei aurre egiteko”.
