Familientzako tailerren agenda kaleratu du Albaolak
Ekainera bitarte, hilean behin antolatuko dituzte haurrentzako jarduerak faktorian. Lehenengoa igande honetan izango da.
Albaola Faktoriako kideek familientzako tailerrak antolatu dituzte hasi den ikasturterako. Asteburuetan izango dira, 10:30etik 12:00etara beti, eta adin desberdinetarako diseinatu dute bakoitza. Lehena datorren igandean izango da, eta ekainean eskainiko dute azkena.
Datorren igandean, hilak 29, Izaki fantastikoen sorgailua izeneko jarduera egingo dute, aipaturiko denbora tartean. Tailerra Albaolan izango da, eta 6tik 12 urtera bitarteko haur eta gaztetxoentzat dago zuzendua. Euskaraz izango da, eta parte hartu nahi duenak 5 euro ordaindu beharko ditu horretarako.
Horra faktoriatik eman dituzten xehetasunak: “Tailer honetan, antzinako mapetan murgilduko gara izaki fantastiko hauek gertutik ezagutu eta ondoren berriak sortzeko. Izaki hauei buruzko istorio harrigarriak sortzen arituko gara adin guztietako abenturazaleei kontatzeko. Ausartu zaitez eta utzi aske irudimena!”.
Gainontzeko tailerrei buruzko informazioa (hilean bat eskainiko dute, hilero, ekainera bitarte) HITZAren Agendaren atalean topatu ahalko duzu.
