Pasaiako poesia lehiaketa abian da
Pasaia Hiria Olerki Lehiaketaren 22. ekitaldia martxan da. Lanak euskara nahiz gaztelaniaz aurkeztu ahalko dira, abenduaren 1era arte.
Hemen da Pasaia Hiria Olerki Lehiaketaren 22. ekitaldia. Zabalik da jada lanak aurkezteko epea, eta hala mantenduko da abenduaren 1era bitarte.
Ohi bezala, bi modalitate izango dira aurten ere. Batetik, euskaraz aurkezturiko lan onenek Xabier Portugal – Pasaia Hiria saria jasoko dute, eta gaztelaniazko onenek, aldiz, Pasaiako Hiria – Altamira Puente izenekoa. Parte hartzaileek gutxienez 18 urte izan behako dituzte.
Modalitate bakoitzean bina diru-sari banatuko dituzte: 1.200 eurokoa lehenari, eta 600 eurokoa bigarrenari. Gainera, Pasaiako Udalak saritutako lanak argitaratuko ditu, aurreko edizioetan saritutako olerki liburuek jasotzen dituzten bildumekin jarraituz. Euskarazko lanak Kezkak bilduman, eta gaztelaniazkoak Noray bilduman.
Baldintzak
Lehiaketara aurkezturiko lanek originalak eta argitaragabeak izan behar dute. Gaia askea izango da bi kategorietan, baina gutxienez 200 bertso izango dituzte lanek. Antolatzaileek ohartarazi dute baldintza horiek betetzen ez badira, obra automatikoki deskalifikatuko dutela.
Epaimahaia literaturaren edo poesiaren munduari loturiko bost adituk osatuko dute, hiru gaztelaniazko modalitatean eta bi euskarazkoan. Balorazio irizpideak, sormenean, originaltasunean eta literatura kalitatean oinarrituta, alkatearen dekretu bidez argitaratuko dira lehiaketaren ebazpenarekin batera.
Eskabideak Pasaiako Udalaren sarrera-erregistroaren bidez edo aurrez aurre HAZ bulegoetan egin beharko dira. Xehetasun guztiak hemen klik eginda zabalduko den weborrian irakur daitezke.
