Inoiz baino "beharrezkoagotzat" jo dute Palestinarekiko "elkartasun uholdea"
Orereta Palestinarekin Herri dinamikak bat egin du ostiralean deituta dagoen elkarretaratzearekin eta ondorengo Al-Yudur elkarteak emango duen hitzaldiarekin.
Orereta Palestinarekin Herri dinamikaren manifestazioa. Lehena izan da. Orereta Palestinarekin Herri dinamikak SOS deia egin du. Ez da gutxiagorako, hotzikara latza eragiten dute azken orduotan zabaldu dituzten datuak: “Hemezortzi egunean 5.700 palestinarretik gora hil ditu Israelgo Estatu genozidak, horietatik 2.000 haurrak; atzo bertan 700 lagun baino gehiago hil zituen Gazan”.
Egoeraren larritasunari erreparatuta, beste behin ere dei egin die herritarrei Orereta Palestinarekin Herri dinamikak, kalea hartzera eta Palestinarekin elkartasunean antolatutakoetan bat egitera. Horren harira hainbat deialdiren berri eman du. Ostiralean, hilak 27, lehenengo biak: “NATO eta EBren aurkako Herri Ekimenak deituta elkarretaratzea izango da 19:00etan Foru plazan, eta 19:30ean berriz, Al-Yudur gazte palestinarren antolakundeko kide baten hitzaldia Gaztañoko auzo lokalean”. Batean zein bestean parte hartzera deitu dute.
Bestalde Bilbon izango den manifestazio nazionalarekin bat egitera deitu ditu herritarrak. 18:00etan abiatuko da Jesusen Bihotza plazatik. Baionan ere deitu dute manifestaziora, azken hori 17:00etan abiatuko da tren geltokitik.
Boikot aktiborako deia ere gogorarazi du dinamikak, eta horretara deitu.
Manifestazioaren balorazio positiboa
Sortu berria den Orereta Palestinarekin Herri dinamikak pasa den ostiralean udalerrian egindako manifestazioaren balorazioa ere egin du: “Antolatutako lehen mobilizazioa izan da, eta oso pozik gaude erantzunarekin, balorazio positiboa egin dugu, izan ere, 400 lagunek egin zuten bat”. Hori horrela, eskerrak eman dizkiete bertaratu ziren herritar guztiei.
Dinamika, datorren asteartean, hilak 31, bilduko da berriro 19:30ean Gaztañoko Bukagaitz elkartean, “gurekin bat egin nahi duten herritarrek ateak zabalik dituzte. Nahikoa da bertan azaltzea”.
