Milioi bat euro Beraunen etxebizitza eraikinak birgaitzeko
Sei proposamen aurkeztu dituzte guztira diru laguntzetarako, eta horien artetik bi aukeratu ditu udalak.
Beraun kalea. Argazkia: Herri bizia. Beraun Planaren barruan, milioi bat euroko inbertsioa egingo du udalak auzo horretako etxebizitza eraikinak birgaitzeko. Sei proposamen aurkeztu dituzte guztira diru laguntzetarako, eta horien artetik bi aukeratu ditu udalak, “proiektuen heldutasun mailarengatik eta eraikin horietan esku hartzeko beharrarengatik”. Gainerako proposamenak, itxaron zerrenda batera bildu ditu udalak, “balizko aurrekontu handitze kasurako”. Guztira, diruz lagunduko diren bi proiektuek 1.160.382 euro jasoko dituzte.
Abian jarritako diru laguntza lerroaren hasierako ideia zen laguntzak Next Generation funtsekin osatzea, eraikinen birgaitzea 100 etxebizitzetara irits zedin. “Gainera, birgaitzearen eta energia eraginkortasunaren arloko helburu handiagoak planteatu ziren, eta auzoko familia ahulenak bereziki kontuan hartzea”, azaldu dute udaletik.
Next Generation funtsak bukatu direnez, helburu horiek murriztu egin behar izan dituzte.
Beraun auzorako proiektu estrategikoa da honakoa, eta Errenteriako Udalak, Eusko Jaurlaritzako Lurralde Plangintza, Etxebizitza eta Garraio sailari aurkeztu zion 3,2 milioi euroko proposamenaren barruan sartzen dira eraikinak birgaitzeko dirulaguntzak, 2022-2025 aldian Beraun auzoan hiri berroneratze integrala bultzatzeko. proiektu hori 2023ko martxoan aurkeztu zion udalak auzoari, bileran.
Hurbiltasuneko bulego bat ere jarri zuen martxan udalak Beraunen, eta auzoko 60 jabeen erkidegoei eman die arreta.
Beraun auzoa berroneratzearekin batera laneratzea bultzatzea ere badu helburu udalak Beraun Planaren bidez. Kolektibo kalteberak laneratzen lagunduko du zehazki. Enplegu plan horren bidez, hamar lagun kontratatuko dituzte urtebetez. Kontratuaren lehen bi hilabeteetan prestakuntza jasoko dute, abendutik aurrera Beraunen mantentze eta berroneratze lanei ekiteko.
