Pasaiako udal tasa eta zergak %3 igoko dira datorren urtean
Hiru urtez izoztuta egon ondoren, ordenantza fiskalak eguneratzea erabaki du udal gobernuak. Igoera handiena, hondakinen tasan.
Teo Alberro, aklatea; Aintzane Taberna, lehen alkateordea; eta Julen Rodriguez, bigarrena. 
Pasaiako udal gobernuak ordenantza fiskalak %3 igoko ditu 2024rako. Igoera orokor horrek, desglosatuta, kirol zerbitzuen tasak ia %6 eta hondakinenak %14 igo beharra ekarriko du, besteak beste.
Azken hiru urteotan izoztuta egon dira herriko zerga eta tasak, eta beraz, gobernuak ebatzi du “beharrezkoa” zela horiek igotzea. Eguneraketa hori egungo KPIaren araberakoa dela argitu du tokiko gobernuak, eta “zerbitzu publikoen kalitatea bermatzea” duela helburu.
Nolanahi ere, Teo Alberro alkate eta Ogasun zinegotziak konpromisoa hartu du datozen hilabeteetan alternatiba berriak abian jartzeko. Horrez gain, udalak pertsona zaurgarrienei laguntzeko “hobari-sistema egokia” duela ziurtatu du udalburuak.
Arloka
Alberrok adierazi du, “gizarte babesa bermatzeko asmoz”, gizarte zerbitzuei dagozkien tasetan eguneratzeak sartu direla. “Zerbitzu hori edonorentzat eskuragarri izan dadin, erabiltzaileen errenta eguneratuz eta tasaren progresibotasuna egungo testuinguru ekonomikora egokituz”, zehaztu du.
Kultura eta hezkuntza arloko programentzat ezarritako tasak ez dira aldatuko indarrean dagoen ikasturtean. Era berean, Alberrok adierazi du gazteek euskara ikasteko hobariak indartu dituztela, hainbat kasutan doakotasuna bermatuta.
Kirol zerbitzuen tasak %5,8 igo ditu udalak, “zerbitzu horien kostuaren igoerari aurre egiteko”. Gastu hori eurotara ekarrita, urteko abonua 4-6 euro bitarte handitzea ekarriko dio erabiltzaileari.
Hondakinen tasa, bestalde, %14,5 handitu behar izan du gobernuak, Espainiak ezarritako eskakizun berriak betetze aldera (7/2022 Legea, apirilaren 8koa). Udalei eskatzen zaie hiri hondakinak biltzeko sistema ez dadila defizitarioa izan, eta neurri hori betetzeko ezarri du gobernuak aipaturiko eguneraketa, “gaur egun hiri hondakin solidoak biltzeak dakarren defizitari aurre egin ahal izateko”.
Testuinguru horretan, alkateak adierazi du 2024an udalak “kontzientziazio-kanpaina indartsu bati” ekingo diola udalerriko gaikako bilketa tasa handitzeko, horrek zerbitzuari dagokion tasa jaistea ekar baitezake.
