Muxikatua I. Bertso Sariketarekin, errima bihurriak Lezon
Piztu Lezok bertsolaritza sariketa berezia antolatu du azarorako. Hil horren 10 eta 17an jokatuko dira finalerdiak, eta 24an finala.
“Bertsoa herrira ekarri nahi dugu, egunerokoan ibili ohi garen tokietara, lezoar ororen belarrira”. Piztu Lezoko kideen hitzak dira aurrekoak. Izan ere, Muxikatua I. Bertso Sariketa antolatu du eragileak, “errima bihurriekin jolasean eta musikarekin dantzan” arituko dira sariketaren barruan izango diren zortzi bertsolariak. Berezitasun bat: entzuleak ikuskizunaren zati izango dira, epaile lanak egingo dituztelako. “Lagun giroko sariketa izango da eta zerikusi gutxi izango du saio eta txapelketa serio eta lehiakorrekin”, zehaztu dute Piztu Lezotik.
Sariketaren barruan hiru saio izango dira. Bik finalerdi funtzioa beteko dute, eta hirugarrena finala izango da. Finalerdi horietako bakoitzetik bi bertsolariri emango diote aukera herritarrek finalean izateko. Honakoa da sariketaren egutegia (bertsoak doinuz edertzen Aner Euzkitze, Libe Goenaga eta Ander Garaiar izango dira):
- Azaroaren 10ean, 22:00etan, Tiñelu tabernan: Oihana Arana, Unai Anda, Asier Alcedo eta Ekhiñe Zapirainen txanda.
- Azaroaren 17an, 22:00etan, Ibai Ondon: Haizea Arana, Maddi Aiestaran, Joanes Illarregi eta Irati Alcantarillaren txanda.
- Azaroaren 24an, 22:00etan, Txerrimuñon: finala, aurreko bi saioetan lehen bi postuetan sailkatu diren lau bertsolariekin.
