Auto karabana, Palestinaren alde
Arramendi magelako aparkalekuan, Gaztaño auzoan, egin dute hitzordua 16:30ean.
Manifestazio jendetsua egin zuen pasa den hilabetean Orereta Palestinarekin Herri dinamikak. Palestinaren alde auto karabana egingo dute bihar, Orereta Palestinarekin Herri dinamikak deituta. Elkartasun karabanan parte hartu nahi dutenek, Arramendiko aparkalekura —Lousada kalea— joan beharko dute, bertan egin baitute hitzordua abiatzeko 16:30ean.
Herri dinamikak herritar guztiak deitu ditu parte hartzera Israelgo Estatua Palestinarekin egiten ari den genozidioa salatu eta palestinarrei elkartasuna adierazteko. Halaber, boikoterako deia berretsi du, eta herritarrei eskatu ez dezatela Israelgo produkturik erosi, “txanpon bakoitza palestinarrak hiltzeko erabiltzen du Israelek, genozidioa gauzatzeko, eta beraz, eguneroko erosketetan Israelgo produkturik ez sartzeko saskietan eskatzen dizuegu, erosten ez dugun bertako produktu bakoitza bala bat gutxiago delako”.
Azken datuen arabera, 8.525 palestinar hil ditu Israelek urriaren 7az geroztik; horietatik 3.542 haurrak dira. Save de Children erakundeak emandako datuen arabera, 2019tik munduan izandako gatazka guztietan denera hildakoak baino gehiago dira hilabeteko epean.
Gernika-Palestina Deialdi Herritarraren mobilizazio eguna
Gazako sarraskia gelditu! Konponbide politikoa orain! Palestinarekin elkartasuna lelopean mobilizatzeko Eguna antolatu du hilaren 7a, asteartea, Gernika-Palestina Deialdi Herritarrak. Hala, goizean hezkuntza zentroetan eta lantegietan mobilizatzera deitu du plataformak, eta arratsaldez, udaletxe aurretan mobilizazioak egitera. Azken horiek, 19:00etan. Errenteria-Oreretan beraz, Herriko Plazan izango da elkarretaratzea.
