Hilaren 12an, irteera gidatua Oielekura
Gipuzkoako Parketxe Sarea Fundazioak bisita gidatua antolatu du Oielekuko mairu baratzeak ezagutzeko. 10:00etan irtengo dira Kausoko aparkalekutik, eta parte hartzeko, beharrezkoa da aurrez izena ematea.
Gipuzkoako Parketxe Sarea Fundazioak irteera gidatua antolatu du Aiako Harria Parke Naturalean kokatua dagoen Oieleku ingurura. Bisita hilaren 12an izango da, igandea, eta eremu horretan dagoen ondarea ezagutaraziko dute gidariek euskaraz.
Irteera horretan Oielekuko mairu baratzeen edo cromlechen bila abiatuko dira, eta natura, paisaia eta mitologia uztartuz, familia giroan goiz “ederra” pasatzeko aukera izango dela zehaztu dute sustatzaileek.
Osatuko duten ibilbidea laburra eta edonork egiteko modukoa bada ere, oinetako erosoak eramatea komeni dela nabarmendu du parketxe sareak. Irteeraren helburua ez da asko ibiltzea, baizik eta “gauzei erreparatuz eta gidariaren azalpenen laguntzarekin, kondairaz betetako paisaian murgiltzea”. Horrez gain, hamaiketakoa egiteko tartea egongo dela jakinarazi dute antolatzaileek.
Irteera hilaren 12ko 10:00etan hasiko da Kausoko aparkalekutik, eta toki berean bukatuko da, 12:30ean. 12 urtetik gorako pertsonentzat sei euroko kostua du bisitak. 12 urtez azpikoek, aldiz, lau euro ordaindu beharko dituzte. Bisita gidatuan parte hartzeko, ezinbestekoa da aurrez izena ematea.
Informazio gehiagorako 943 49 50 69 eta 688 89 50 68 telefono zenbakiak eta helbide elektronikoa ahalbidetu ditu parketxe sareak.
