Oarsoaldeko monumentu megalitikoak ezagutzeko, sei ibilbide
Oarsoaldea Garapen Agentziak eskualdeko monumentu megalitikoak ezagutzeko sei ibilbide proposatu ditu, arbasoen historia esploratzeko. Aiako Harria Parke Naturalean eta Lau Haizeta Parkean barrena dira.
Oarsoaldea Garapen Agentziak eskualdean dauden monumentu megalitikoak ezagutzeko sei ibilbide proposatu ditu, “arbasoen historia aberatsa esploratzeko”.
Sustatzaileek denboran atzera egiteko bidaia bat proposatu dute Aiako Harria Parke Naturalean eta Lau Haizeta Parkean barrena, Errenteria-Orereta eta Oiartzungo udalerrietan. Ibilbide horietan monumentu megalitikoak aurki daitezkeela jakinarazi dute; hala nola, menhirrak, zistak eta trikuharriak.
Eremu horietan Euskal Herri osoko estazio megalitiko handienetako batzuk biltzen direla adierazi du garapen agentziak, Neolitikotik Burdin Arora bitartekoak. Horrez gain, ibilbide bakoitza antzinako egitura horien historian murgiltzeko diseinatuta dagoela nabarmendu, eta adin eta maila fisiko guztientzako pertsonentzat egokiak direla gaineratu dute.
Hauexek dira monumentu megalitikoak ezagutzeko sei ibilbideak:
Aitzetako Txabala
- Herria: Errenteria-Orereta.
- Sarbidea: Zamalbide auzotik edo Aitzetako Txabala atsedenlekutik.
- Ikus daitezkeen monumentu megalitikoak: Trikuharriak: Aitzetako Txabala, Berrozpin I, II eta III. Txoritokietako monolitoa.
Langagorri-Aizpitarte Haitzuloak
- Herria: Errenteria-Orereta.
- Sarbidea: Listorreta atsedenlekutik.
- Ikus daitezkeen monumentu megalitikoak: Langagorriko monolitoa eta Aizpitarte haitzuloak.
Sorondo
- Herria: Oiartzun.
- Sarbidea: Karrika auzotik Artikutzarako norabidean, GI-3631 errepidearen 7,5 kilometroan desbideratzea Sorondoko landara. SL-GI 1004 delakoaren zati bat da.
- Ikus daitezkeen monumentu megalitikoak: Elorritako gaina harrespila.
Egiar-Urkullu Txiki Egia
- Herria: Oiartzun.
- Sarbidea: Oiartzungo Gurutze auzotik, Aiako Harria-Irun norabidean, GI-3454 errepideko 3,8 (Egiar) eta 5,8 (Urkullu) kilometroetan.
- Ikus daitezkeen monumentu megalitikoak: Egiar Urkullu harrespilak.
Oieleku
- Herria: Oiartzun.
- Sarbidea: Sorondokoan bezala, Karrika auzotik Artikutzarako noranzkoan, GI-3631 errepidearen 12,5 kilometroan. Ibilbidearen zati bat PR-GI 1006 ibilbidetik doa.
- Ikus daitezkeen monumentu megalitikoak: Harrespilak: Kauso I, Kauso II, MUnerre, Oieleku hegoa/iparra eta Aritxurieta gaña. Gainzabal trikuharria.
Bianditz
- Herria: Oiartzun.
- Sarbidea: Karrika auzotik Artikutzarako norabidean, GI-3631 errepideko 14,8 kilometroan.
- Ikus daitezkeen monumentu megalitikoak: Arritxulagaña eta Errenga harrespilak.
Sei ibilbide horien inguruko informazio gehiago zabaltze aldera, Oarsoaldea Garapen Agentziak eskualde osoko mapa bat argitaratu du proposatutako ibilbideekin, baita artxibo digital deskargagarri bar ere, ibilbide bakoitzari buruzko informazioarekin. Argitalpen horiek garapen agentziaren webgunean eta eskualdeko bulegoetan aurki daitezkeela nabarmendu dute.
