Tentsioa udalean zerga eta tasen igoeragatik
PSE-EEk "neurrigabetzat" jo du igoera, eta EAJk hobariak eskatu ditu hondakinen alorrean. Horiek ezartzea aurreikusia zuela dio EH Bilduk.
Hondakinen tasaren igoera da udalean polemika gehien sortu duena. 
Azken udalbatzarreko gai zerrendan eztabaidarako tarte gehiena zerga eta tasen igoera onartzeko puntuak hartu zuen. Oposizioko bi alderdiek, EAJk eta PSE-EEk, kontrako botoa eman zuten puntu horretan; edonola ere, gobernuko bederatzi zinegotzien aldeko bozekin, aurrera atera ziren erabakiak.
Aurreko astean jakinarazi zuen EH Bildu eta Podemosek osaturiko koalizio gobernuak udal tasa eta zergak %3 igoko zituela, eta plenora eraman zituzten zerga ordenantzen aldaketak. Bozketari ekin baino lehen, Teo Alberro alkateak eguneraketari buruzko azalpenak eman eta berretsi zuen datorren urtean kontzientziazio kanpaina bat martxan jartzeko asmoa duela gobernuak.
PSE-EE
Hitzartzeen tartean, PSE-EE taldearen eledun Andrea Palomaresek hartu zuen hitza lehenengo. Alderdi horren arabera, gobernuak egindako eguneraketa “neurrigabea” da, eta gobernuak ez du “inolako sentikortasunik” adierazi horrekin Pasaiako familiekiko.
Hondakinen tasan (%14,5eko eguneraketa) “igoera graduala” galdegin zuen Palomaresek, kontuan hartuta 2020tik izoztuta izan direla zerga eta tasak, pandemiaren testuinguruan. Horrez gain, elkarlanean ez aritu izana ere leporatu zien gobernukoei eledunak: “Ez diguzue denbora eman aportaziorik egiteko. Proposamena astelehen arratsaldean helarazi eta asterte eguerdian kaleratu zenuten prentsa oharra”.
EAJ
Loreto Osa bozeramaile jeltzaleak aitortu zuen eguneraketa batzuk ulergarriak eta beharrezkoak baziren ere, “lanketa sakon baten falta” antzeman duela alderdiak EH Bildu eta Podemosen proposamenean.
Funtsean bi alderdigatik adierazi zuen kezka Osak: batetik, eta Palomaresen ildo beretik, igoeran progresibitaterik antzeman ez dutelako, eta bestetik, eta “larriena” EAJrentzat, gobernuak ez duelako hobaririk planteatu organikoaren edukiontzia erabiltzeagatik.
Hemen klik eginda irakur daiteke alderdi jeltzalearen balorazioa (PSE-EErenaren euskarazko bertsiorik ez du jaso hedabide honek).
EH Bilduren erantzuna
Oposizioko alderdiek ziurtatutakoaren kontrara, hondakinen tasan gobernuak igoera progresiboa planteatu duela ziurtatu zuen Iraitz Pazos EH Bilduren bozeramaileak: “Dakigunez, hemengo talde guztiok onarturiko legeak udaloi betebehar batzuk ezartzen dizkigu 2025erako. Horietako bat da hondakinen bilketa zerbitzua defizitarioa ez izatea”.
Zentzu horretan, Pazosek argitu zuen une honetan aipaturiko tasa %14,5 igo bada ere, igoera hori “askoz handiagoa” izan zitekeela, eguneraketa horrekin ere ez baita defizit osoa kubrituko (%25 ingurukoa da hori). “Zer planteatzen duzue zuek”, galdetu zien jeltzale eta sozialistei, “datorren urtean, kolpean, %25 igotzea?”.
Esan zuen, halaber, hondakinei loturiko kostuak 2015etik bikoiztu egin direla, eta kudeaketa horretan dagokien erantzukizuna hartzeko eskatu zion oposizioari Pazosek: “Aurreko zortzi urteetan faltan bota ditugu prebentzioa eta kontzientziazioa. Datuak ikusita, ondorioa garbia da: kudeaketa negargarria izan da, eta tasa honen igoera da kudeaketa negargarri horren ondorioetako bat”.
Osari erantzunez, une honetan hondakinak erregulatzeko indarrean dagoen sistemak EH Bilduk nahiko lituzkeen hobariak ezartzea ezinezkoa dela esan zuen gobernuaren eledunak, “ez baitakigu nork irekitzen duen organikoaren edukiontzia”. Hori erregulatu eta saritzeko neurriak aztertzen ari direla ziurtatu zuen Pazosek.
