[Argazkiak] Sheroes Hangout proiektuko emakumeak Pasaian dira
Bien gorputzak erreak izan baziren ere, desberdinak dira Ritu eta Mousumi emakume indiarren bizipenak. Horiek arratsaldean kontatuko dituzte.
Oroigarria eman die alkateak Ritu eta Mousumiri. 
Harrera instituzionala egin diete gaur eguerdian Pasaiako udaletxean Chhanv fundazioak sustatutako Sheroes Hangout proiektuko kideei, Ritu eta Mousumi. Haiekin etorri dira Alok Dixit Chanj Chhanv fundazioaren zuzendaria eta Rajni Kant itzultzailea.
Haiei ongi etorria eman ondoren, eskerrak eman dizkie Alberrok Bekoz Bekoko kide Izaskun Barbier, Clara Barbier eta Cristina Lopezi: “Zuen lanik gabe gutako inor ez baikinateke hemen izango gaur, harrera hau ospatzen”. 2017tik dihardu Pasai Antxoko elkarte feministak Indiako Chhanv fundazioarekin elkarlanean.
Bekoz Bekoren eskutik, hain zuzen, heldu dira aurten berriro Pasaiara Sheroes proiektuko emakumeak. Talde hori Chhanv fundazioaren ekimenez jaio zen, azidoarekin erasotutako emakumeentzako elkargune bat sortu eta haien bizipenak gizarteratzeko.
Azido erasoen biziraule diren emakume horiek Pasaian izango dira egun hauetan euren testigantzak partekatzeko. Alkateak dei egin die bizilagunei Bekoz Bekok datozen egunotarako antolatu dituen jardueretan parte hartzera. Eta, bereziki, gaur arratsaldean, 18:30ean, elkartearen egoitzan Ritu eta Mousumik eskainiko duten hitzaldira bertaratzera.
Gaurko agerraldian Pasaiako Udalbatzan ordezkaritza duten alderdi guztietako ordezkariek parte hartu dute. Gobernutik, Teo Alberro alkateak eta ondoko zinegotziek: Aintzane Taberna, Iraitz Pazos, Laura Re, Aitor Brion, Natitxu Etxarri, Mikel Garcia eta Julen Rodriguez (Ahal Dugu-Podemos). PSE-EEtik Lore Suarez, Miguel Angel Crespo eta Andrea Palomaresek. Eta EAJtik Koldo Errondosorok.
