Udala herritarrekin bildu da urrian zehar
Zortzi auzo batzar egin dituzte urrian zehar herritarren ekarpenak eta iritziak jasotzeko. Aurten 157 oiartzuarrek hartu dute parte, eta bilkura horiek "oso aberasgarriak" izan direla esan du udalak.
Oiartzungo Udalak bilerak egin ditu auzoz auzo urrian zehar, eta “arrakastatsuak” izan direla jakinarazi du. Egitasmoa duela 12 urte abiatu zuten, eta bilkura horien helburua da herritarrei hurrengo urterako aurreikusitako proiektuak eta aurrekontu proposamena azaltzea, beraien ekarpenekin aberasteko. Orotara, 157 lagunek hartu dute parte deitutako zortzi deialditan, iaz baino 20 pertsona gehiagok, eta aurtengoak izan dira azken urteetako batzar jendetsuenak.
Gobernu taldea “pozik” azaldu da herritarren iritziak entzun, lehentasunak eta interesak ezagutu, elkar ulertu, konfiantza eraiki eta adostasunak bilatzeko “aukera ezin hobea” direlako batzarrak. Joana Mendiburu alkateak auzotarrek egindako ekarpenen garrantzia nabarmendu du: “Auzo batzarrak elkar entzuteko gunea dira; udalaren egitasmoak eta aurrekontua azaltzeko, auzotarrek herrian egingo denaren berri izateko eta aldi berean beraien kezkak agertzeko. Niretzat, dena den, esan beharrekoa esatea bezain garrantzitsua da besteen iritzia entzuten jakitea”.
Batzarren bukaeran betetako galdetegiko emaitzen arabera, auzotarrentzat ere saioak probetxugarriak izan direla adierazi du udalak: 8 puntutik gorako nota eman diote parte hartzaileek batez beste batzar bakoitzari.
Bizikidetza, kezka aipatuena
Abiatutako batzarrak jendea ezagutzeko, entzuteko eta “herritarren bizitzak hobetuko dituzten neurri zehatzak eta eraginkorrak” hartzeko “oso aberasgarriak” izan direla jakinarazi du alkateak.
Kezkei dagokionean, bizikidetzarekin lotutakoak izan dira auzoetan gehien errepikatu direnak; esaterako, autoen abiadura eta aparkalekuak. “Akaso, hori bada herrian barrena mugitzeko ditugun ohiturak aldatzen hasteko seinale bat”, esan du Mendiburuk auzotarren kezken gainean.
Gazteekin hilaren 24an
Auzo bileretan erabilitako aurkezpenak eta akta guztiak Oiartzungo Udalaren webgunean argitaratu dituzte, Auzoak atalean.
Saioetako parte hartzaile gehienak 30 urtetik gorakoak izan dira, baina 30 urtetik beherakoen iritziak ere jaso nahi ditu udalak. Hori dela eta, datozen lau urteetako erronkak eta proiektuak gazteekin partekatu eta haien ekarpenak jasotzeko saio propioa egingo dute hilaren 24an. Udalak datozen egunetan zehaztuko du batzar horren tokia eta ordua.
