Zubikarai sariaren erdia, Karmele Mitxelenarentzat
Epaimahaiak bi proiektu saritu ditu, Karmele Mitxelena oiartzuarrarena, eta Goio Ramos basauriarrarena. Saria erdibana egingo dute eta bien lanak datorren urtean argitaratu.
Karmele Mitxelena Etxebeste. Karmele Mitxelenak irabazi du Augustin Zubikarai saria. Ez du baina lorpen handia bakarrik gozatuko, izan ere, lehiaketara aurkeztutako Goio Rammos basauriarraren lanari ere aitortu dio sari bera epaimahaiak. Bi idazleen artean, beraz, ex aequo banatu da aurten Ondarroako Udalak eta Elkar argitaletxeak antolatzen duten saria.
Hogeita hamabi lan aurkeztu dira sariketara aurten, eta antolatzaileek lanen “maila ona” jarri dute nabarmen, “besteak beste, horregatik bi proiektu saritzea erabaki du Leire Bilbaok, Xabier Mendigurenek eta Ana Urkizak ostatutako epaimahaiak”.
Zoriontasuna edo antzeko zerbait lanarekin saritu dute Mitxelena. Alargun gelditu berri den emakume heldu batek —Maria—, bere burua berrasmatu nahian egindako barne eta kanpo bidaia kontatuko du. Sentimenduak lehen lerroan jarriko ditu idazleak eleberri horretan, poza, haserrea, tristura, lotsa, errua….
Horrenbestez, bi saridunek, bien artean banatuko dute 8.000 euroko saria, eta bien lanak argitaratuko dituzte datorren urtean, une honetan proiektu direnak amaitzen dituztenean, alegia.
