Diskriminazioa ezabatzea helburu duen kultur astea
Gaurtik hasita Ijito Kultur Astea egiten ari dira Errenteria-Oreretan. Ijito kafea, solasaldiak, film emanaldia, eta pilota txapelketa egingo dituzte, besteak beste.
Ijito Kultur Astea aurkeztu dute. Gaurtik hasita Ijito Kultur Astea egiten ari dira Errenteria-Oreretan. Azoka txikia baliatu dute aurten, astearen urteroko lehen ekitaldia izaten den ijito kafea egiteko. Jose Ramon Jimenez Camacho Kamelamos Adiquerar elkarteko kideak eman du ondu duten programaren berri gaur egindako agerraldian. Lehenik eta behin, astearen helburua “diskriminazioari” eta “ijitoen aurkako jarrerari” aurre egitea dela zehaztu du.
Ez da nolanahikoa egin duten bidea, aurtengoa hogeita batgarren ekitaldia du asteak: “Ijito komunitatearen eta Errenteriako herriaren arteko zubiak eraikitzearen aldeko apustua egin dugu”.
Gaurtik hasi eta ostiralera arte egingo dute Ijito Kultur Astea. Ijito kafearekin hasi dituzte antolatutako ekitaldiak eta arratsaldean astearen klasiko bihurtu den Montxo Jimenez Esku Pilota Txapelketa abiatuko dute. Agustina Otaola pilotalekuan izango da hori; Mindara eta EPLEko pilotariak arituko dira norgehiagoka 20:00etatik 21:00etara.
Bihar, asteartea, Ezagutzen nauzu? Ijito kulturaren gaineko Kahoota antolatu dute. Presentzialki egiteko aukera izango dute bertaratzen diren haurrek Erdialdeko ludotekan, eta gainontzekoetan berriz, online, 18:00etatik 19:00etara. Asteazkenean, gauza bera egingo dute baina Gaztelekuetako gazteei begira. Lekuona Fabrikan izango da 1730etik 19:00etara. Ondoren, 19:00etatik 21:00etara, Montxo Jimenez Esku Pilota Txapelketaren partidak jokatuko dituzte.
Solasaldia eta film emanaldia
Ostegunean mahaiaren bueltan elkartuko dira Badalaben , Gaur gertuago topaketa Joxepa Antoni Aranberri anitzagunean 17:00etan hasita. Bertaratzen direnek ijito komunitatearen gainean dituzten zalatzantzak galdetzeko aukera izango dute eta lehen eskutik jasoko dute erantzuna. Eguna borobiltzeko, berriz, Papuzska filma ikusteko aukera izango da, doan Niessen zinemetan 19:00etan. Jimenezek nabarmendu duenez, Ozzinemarekin elkarlanean antolatutakoa da ekintza hori.
Hilaren 10 izango da astearen azken eguna. Ordurako pilota txapelketaren finalak utzi dituzte. Partidak bezalaxe, Agustina Otaola Raketista profesionalaren pilotalekuan jokatuko da, eta sari banaketa ere bertan egingo dute.
Gaur bertan, gainera, Errenteriako Udalak ijito bandera izango du zintzilik balkoian, eta gauez fatxada bandera horren koloreekin argiztatuko du.
Maite Gartzia Kultura zinegotziak Errenteria-Oreretan kultura askotako eragileak daudela jarri du nabarmen, “baina ez gaude sakabanatuta, zubiak eraikitzen ditugu guztion artean. Aste honek ere horretarako balio dizue eta digu guri ere. Eskerrik asko antolaketarengatik, eta jakin udalaren aldetik laguntza eta babesa jasoko duzuela”.
Gartziak nabarmendu du ere bandera udaletxearen balkoian izango dela, “lehen aldiz, ez da aste osoan izango, baina gaur bai”. Herritar guztiak deitu ditu parte hartzera, “ezagutzen ez ditugun horiek ezagutzera animatu nahi ditut. Hau oso aukera ona da guztiontzat”.
60 ijito familia udalerrian
Ijito komunitatea zenbat herritarrek osatzen duten jakitea zaila dela esan du Jimenezek bestalde, “ez da egiten zentsu hori, eta kontuan hartu behar da Errumaniatik heldu eta ijitoak diren biztanleak badirela, baina errumaniar gisa hartzen dituzte aintzat. oso zaila da beraz kopuru zehatz bat ematea”. Hala ere, udalerrian, Kamelamos Adiquerar elkartearekin harremanetan diren 60 familia dituztela erantsi du, “gehiago dira ijito komunitateko kideak, baina ez dugu zenbaki zehatza, ez da erraza”.
