Osasun publikoaren defentsa lehen lerroan jarri du Duintasunak
Iztietako anbulatorioaren egoerarekin kezka azaldu du pentsiodunen mugimenduak. Urgentzietako zerbitzua gero eta prekarioagoa dela salatu dute.
Duintasunaren manifestazioa Pentsiodunek kaleak hartu dituzte berriro. 1080 euroko gutxieneko pentsioa galdegin dute gaurko protestan, eta argi esan dute, pentsioen osagarria lortzeak ez du atzeerapenik onartzen: “Ez dago gehiago itxaroterik Gasteizko legebiltzarrak eta Nafarroako parlamentuak urte honetarako eta hurrengoetarako aitortu eta aplikatu behar dute, eta urtero eguneratu, gutxienez benetako KPIarekin”.
Aldarri horrekin Euskal Herriko Pentsiodunen Mugimenduak manifestaziora deitu du datorren larunbatean (hilak 11) Iruñean eta hilaren 16an Gasteizen. Halaber, Araba, Bizkai eta Gipuzkoako udaletan mozioak aurkezteko kanpaina abiatu duela mugimenduak jakinarazi dute gaurko mobilizazioan”.
Beste gai bat ere jarri dute erdigunean pentsiodunek. Osasun publikoaren egoera. Kezkaz bizi dute, eta ez da gutxiagorako eman dituzten datuak benetan kezkatzekoak direlako eta herrira etorrita, hilzorian dela larrialdietako zerbitzua Iztietako anbulatorioan salatu dute.
“Egoera oso delikatua da, badakigu herri pila bati eragiten diela antzeko egoerak, baina larria da benetan gaur-gaurkoz Iztietako anbulatorioko errealitatea. Arreta jarraituko puntua Oarsoaldeko biztanleentzat Iztietako anbulategian dago, larrialdiak direna, medikurik gabe dago. Helarazi diguten informazioaren arabera, gainera, bost familia mediku falta dira une honetan anbulatorio horretan”.
Duintasunak anbulatorioari diagnostikoa egiteko eskatu dio, “zehaztu dezan zein den egoera une honetan”, azaldu dute.behin egoeraren azterketa hori eskua artean dutela, mobilizazioak antolatzen hasiko direla jakinarazi dute Duintasunako ordezkariek: “Epe laburrean helduko dela espero dugu. Izan ere, pazienteengan du eragina egoerak, baina baita profesionalengan ere. Pentsa, erizainei ari zaizkie eskatzen diagnostikoak egitea eta horrek ardura handia suposatzen du langileentzat, medikuen papera bere gain hartzea eskatzen ari zaizkie. Ardura handia da haientzako”.
Auzoetako auzo elkarteekin, eta udalarekin harremanetan jartzeko asmoa ere iragarri du Duintasunak egoera hori salatzeko garaian.
Horrekin lotuta, osasun publikoak oro har eta Lehen Mailako Arretak, bereziki, bizi duen egoeraren aurrean mobilizaziora deitu dute larunbatean Araba, Bizkai eta Gipuzkoako hiriburuetan. Osasun Publikoaren Defentsarako Herritarren Koordinakundeak antolatu ditu manifestazio horiek. Donostiakoa 17:00etan abiatuko da Bulebarretik.
Euskal Herriko pentsiodunen Mugimenduak bat egin du deialdiarekin, eta horrenbestez, pentsiodun guztiei dei egin diete parte hartzera, “adinagatik arreta hurbila, duina eta kalitatezkoa gehien behar dugun kolektiboa garelako. defenda dezagun gurea dena”.
