"Lizarran gertatutako erailketa matxista erabat gaitzesten dugu"
Adierazpen instituzionala egin dute udal talde guztiek adostuta; bat egin dute mugimendu feministak antolatutako elkarretaratzearekin.
Aho batez onartu dua dierazpena Errenteriako Udalak. Errenteriako Udaleko talde politiko guztiek, adierazpen instituzionala adostu dute, “Lizarran indarkeria matxistaren biktimaren erailketa salatu” eta mugimendu feministak biharko deitu duen elkarretaratzearekin bat egiteko.
Elkarretaratzea bihar, ostirala, egingo dute 19:00etan Niessen merkatalgunearen sarreran.
Lau puntu ditu adierazpenak, honakoak hitzez hitz:
1.- Errenteriako Udalak erabat gaitzesten du aste honetan Lizarran gertatutako erailketa matxista eta zero tolerantzia adierazten du eraso matxista guztien aurrean.
2.- Horrelako gertaerak ez ditugu gure jendartean onartzen eta erakunde gisara lanean jarraituko dugu emakumeak, nerabeak eta haurrak indarkeria matxistarik gabe bizi gaitezen. Halaber, Errenteriako Udalak herritarrak gonbidatzen ditu, eta bereziki gizonezkoak, beren jokabide eta jarrerei arretaz erreparatzera eta edonolako erasoren aurrean jarrera aktiboz jokatzera.
3.- Errenteriako Udaletik familiari gure elkartasunik beroena adierazi nahi diogu.
4.- Udalak bat egiten du erailketa hori gaitzesteko Mugimendu Feministak bihar, azaroak 10, 19:00etan Niessenen deitu duen mobilizazioarekin eta herritarrei bertan parte hartzeko gonbita luzatzen die.
