Donibaneko gizonen lehen taldea garaipenaren bidera itzuli da
Emakumeek alde nabarmenarengatik galdu zuten, eta jubenilek, azken minutuetan. Gizonen Bigarren Lurraldeko Mailako taldeei dagokionean, Mitxintxolaren partida bertan behera geratu zen, eta Kalaburtza garaipenarekin itzuli zen etxera.
Decotextil Euskadi Donibane Eskubaloiako gizonen lehen taldea garaipenaren bidera itzuli da. Azken jardunaldietan talde indartsuen aurka galdu ondoren, garaipen argia lortu zuten larunbatean Elgoibarren (18-31). Garaipen horrek konfiantzaz bete ditu arrosak.
Elgoibarrek iazko denboraldian lortu zuen igoera Donibanerekin batera. Aurten, baina, punturik atera gabe dira oraindik, sailkapenaren azken postuan. Pasaitarrek egoera hori baliatu zuten garaipenaren bidera itzultzeko.
Arrosak nagusi izan ziren partida hasieratik, eta sei goleko abantailarekin iritsi ziren atsedenaldira (11-17). Bigarren zatian gogor aritu ziren defentsan, eta etxeko taldeak ezin izan zuen markagailua irauli. Aldea handitzen joan zen gutxika, eta Pepelu Ramosen taldeak garaipen argia lortu zuen (18-31). Garaipenarekin sailkapenaren seigarren postuan kokatu dira, 7 punturekin.
Emakumeak
Emakumeen lehen taldeak, Urkabe Eskubaloiak, ezin izan zuen bere partida aurrera atera, eta alde nabarmenarengatik galdu zuten Munttarperen aurka (44-13). Sanjuandarrek partida zaila zuten, lezoarrak sailkapenaren bigarren postuan baitira.
Donibanek ez zuen hasiera erosoa izan, eta Munttarpe aurretik jarri zen markagailuan (5-0). Hortik aurrera, sanjuandarrak hobeto egon ziren kantxan, eta minutu batzuez indarrak berdindu zituzten bi taldeek. Etxeko taldeak, baina, partidaren kontrola berreskuratu zuen, eta abantaila argiarekin iritsi ziren atsedenaldira (20-7).
Bigarren zatia, aurkako abantaila medio, probak egiteko baliatu zuten pasaitarrek, eta horrek, markagailuko aldea handitzea eragin zuen. Hala ere, proba horiek hurrengo jardunaldietan hobetzeko aukera emango diete.
Gizonen B eta C taldeak
Gizonen arloak hiru talde senior atera ditu aurten, eta Donibane Mitxintxola eta Donibane Kalaburtza Gipuzkoako Gizonen Bigarren Lurraldeko Mailan lehiatzen ari dira. Mitxintxolaren partida bederatzigarren minutuan bertan behera utzi zuen epaileak zorua heze eta irristakor zegoelako. Kantxa jokalarientzat arriskutsu zegoen. Momentu horretan sanjuandarrak aurretik ziren markagailuan (Donibane 5-4 Munttarpe), eta partida zehazteke dagoen data batean jokatuko da.
Bestalde, Kalaburtzak garaipena lortu zuen etxetik kanpo Leizaranen kontra (25-29). Sanjuandarrak hobeak izan ziren, baina markagailuko aldeak ez ziren inoiz handiak izan. Atsedenaldira, esaterako, 13-17 iritsi ziren, pasaitarren alde. Erasoan fin ibili baziren ere, sanjuandarrek ez zuten garaipena azken minutuak arte ziurtatu, baina bi puntu gehiagorekin itzuli ziren etxera.
Jubenilak
Jubenil gizonek gertu izan zuten garaipena, baina esku hutsik itzuli ziren Egiatik (18-17). Sanjuandar gazteak puntuak ateratzetik gertu izan ziren, baina aurreko jardunaldietan gertatu bezala, garaipenak azken minutuetan egin zien ihes.
