Agintaldi plana aurkeztuko du Gobernu taldeak gaur zortzi
Agertoki berria aukeratu du aurkezpen hori egiteko: Kultur eta sormen industrien poloa izango den Agustinak eraikina.
Agustinak eraikinean aurkeztuko du gobernu taldeak agintaldi Plana. Egun horretan zabalduko ditu ateak kultur eta sormen industrien poloak. Udal gobernuak agintaldi planaren aurkezpena egingo du hilaren 24an, ostirala. Datozen lau urteetarako proiektuak eta erronkak aurkeztuko ditu. 18:00etan hasiko da ekitaldia eta hilabeteetako lana herritarrekin partekatu nahi du orain gobernu taldeak, “plana bera herritarrekin eurekin garatzeko ondoren”.
Horrenbestez aurkezpenera gonbidatu ditu herritarrak, eta izena emateko eskatu. Horretarako hemen klik egin.
Agertoki berezia aukeratu du gobernu taldeak. Egun horretan bertan ateak zabalduko dituen Kultur eta sormen industrien poloa izango den Agustinak eraikinak, eta horrek hartuko du agintaldirako prestatu duten plan berriaren aurkezpena.
Hilabeteetako lana du atzean agintaldi planak, eta lehenik gobernu kideen artean adostuta, ondoren, udal langileekin batera landu eta zehaztu dute. 60 proiektu jasotzen ditu eta udal jardunaren iparrorratza izango da. Bertara bildutako proiektuak baina, herritar eta eragileekin batera garatu nahi dituela esna du gobernu taldeak, eta aurkezpen irekia parte hartzea garrantzitsutzat jo du.
Datozen lau urteetako agintaldi plana ezagutzearekin batera, Agustinak eraikina ezagutzeko beta izango dute bide batez gerturatzen diren herritarrek. Aurretik egingo dute hori, 17:15etik 18:00etara, ate irekiak antolatu baititu udalak. Ate irekietan ez da izena eman behar parte hartzeko, baina agintaldi planaren aurkezpenean izateko ordea, bai.
