Egonezina erakutsi dute dozenaka herritarrek
Iztietako anbulatorioan egunetik egunera okertzen ari da egoera eta ez daude prest ezer egin gabe gelditzeko.
Dozenaka herritar bildu dira Iztietako anbulatorio aurrera murrizketak salatzera. Egonezin horren erakusle izan dira, gaur, anbulatorio aurrera azaldu diren dozenaka eta dozenaka herritarrak. Ez zegoen deitzaile zehatzik, ezta pankarta edota txartelik ere gaurko hitzordu horretan. Izan ere, sare sozialak baliatuta bertaratzera deitu ditu herritar batek osasun publikoaren egoerarekin kezkatuta dauden herritarrak, baita erantzun ere. Kexak eta kezkak, partekatuak. “Familia medikuarekin hitzordua urtarrilaren 5erako eman didate gaur eskatuta, zer da hau?”, esan du gaur anbulatoriora hurbildu den herritar batek.
Goiko aldeko auzoetatik ere joan dira elkarretaratzera. Kexu zen horietako bat, jende guztiak kalean behar lukeela osasun sistema publikoan egiten ari diren murrizketak salatzen uste baitu, “Beraungo anbulatorioaren inguruan protestak egin genituenean, manifestazio handi-handia osatu genuen. Murrizketen aurrean jende guztiak kalean izan beharko luke”.
Aurreko ostiralean, gaur zortzi, OPA osasun publikoaren aldeko plataformak ere deitu zuen elkarretaratzera, eta bat egin zuen Duintasuna jubilatuen elkarteak, baita mugimendu feministak ere. Duintasunak eman zituen hilabete honetako protestan Iztietako anbulatorioaren datu batzuk, kezkagarriak oso: Bost familia mediku falta dira une honetan anbulatorio horretan. Hori gutxi balitz, Oarsoaldeko biztanleentzat Arreta Jarraituko Puntua da anbulatorio hori, larrialdietako zerbitzua, baina gehien-gehienetan medikurik ez dago zerbitzu horretan.
Gaurko elkarretaratzearen berri azken momentuan izan dute Duintasuna elkarteko kideek eta OPA plataformakoek. Bestelako informazioaren faltan, beraien ordezkari batek azaldu die zein den une honetan egoera anbulatorio kanpoaldera bildu direnei: “Egoeraren larritasunaren aurrean diagnostiko bat egiteko eskatu diogu anbulatorioari. Asteartean gara biltzekoak bertako zuzendaritzarekin, eta orduan jakingo dugu, zehatz, zein den egoera”.
Anbulatoriora bertaratu diren herritarren iniziatiba txalotu du, gainera, “gaurko deialdiarekin zerikusirik ez dugu, pertsonaren batek egindako bat bateko kontua izan da, eta oso ondo dago herritarrok gure kabuz halakoak deitzea eta kezka azaltzea”.
Asteartean jasoko dute erantzun argi bat beraz, eta horrek erakutsiko du Iztietako anbulatorioaren egoera zein den, zein pertsonal, bitarteko eta zerbitzu falta diren, eta zein bide hasi behar den egoera leheneratzeko. Egun horretatik aurrera adi egoteko eskatu dute, izan ere mobilizazio eta protestak deitzeko asmoa azaldu dute egoeraren larritasunaren aurrean, eta herritarrei dei egin diete bat egin dezaten “ezinbestekoa den” osasun publikoaren aldeko defentsan.
