Abian da herriko parke sarea eraberritzeko prozesua
Herriko parkeen errealitatea ezagututa, herriko eragileekin bilera aroa hasi dute. Atzo bertan egin zuten lehen bilkura.
Lezoko parke sarea eraberritzeko gogoeta prozesua abian da. Herriko eragileak ari dira jada euren iritzia ematen, parte hartze prozesuaren barruan. Atzo arratsaldean (osteguna) esaterako bilera egin zuten Kultura Aretoan, aisia eremuan lanean dabiltzan eta ikastetxeetako ordezkariekin besteren artean. Lezoko Udalaren ekimenez ari dira garatzen, Hiritik At! kooperatibako kideen koordinaziopean.
Asmoaren aurkezpenean Iker Salaberria zinegotziak adierazi zuen parke eta haurren aisialdi eremu horiek familien topaleku ere badirela , “belaunaldi ezberdinen elkargune dira. Espazio horiek lezoarrak beren artean ezagutu eta euren arteko harremanak lantzeko guneak ere badira, eta hortaz, funtzio garrantzitsua betetzen dute ikuspegi pedagogiko batetik, baita ikuspegi sozial batetik ere”. Hala, proiektuaren bidez gaur egun udalerrian diren parkeen egoera aztertzearekin batera, beste hainbat espazio natural ere txertatu dituzte lanketa horretan, “aisialdirako eremu interesgarri izan daitezkeelakoan”. Honakoak dira espazio natural horiek: Pisbeko baratze ingurunea, Xoxolur eremua eta Zubitxo errekaren eremua.
Parkeen eraberritzearena prozesu parte hartzailea izango da. Atxoko saioa horren erakusle. Haurrei ahotsa emango diete, eta herriko espazioak izanik, “espazio publikoak” zaintza ikuspegia dutenei ere zabalduko diete atea prozesuan parte har dezaten, “guraso, aiton-amonak… ere nahi ditugu prozesuan informazio asko baitute espazioaren gainekoa”. Horiekin batera herriko eragile eta talde ezberdinak, udal teknikariak, eta udal ordezkariak ere arituko dira prozesuan.
Prozesua
Atzokoaren aurretik jada lanketa hasia dute. Espazioak ezagutu eta behaketak egingo dituzte, parke bakoitzaren erabilera zein den ikusteko eta dokumentazioa jasotzeko. Jada bileren aroa hasi dute, herriko hainbat eragilerekin egingo direnak. Diagnostikoaren txanda helduko da ondoren Ainhoa Retegi Hiritik At!-eko kideak egitasmoaren aurkezpenean azaldu zuen bezala: “Ahotsa emango diegu haurrei. Diagnostikoaren helburua izango da parkeen erabilera ezagutzea eta oro har zein behar dituzten biltzea. Horretarako fitxak helaraziko dizkiegu haurrei ikastetxe eta aisialdi elkarteen bidez”. Haur gehienengana heltzea da helburua. Hartzaileak, berriz, parte hartze prozesuan aritzeko, 3 eta 12 urte artekoak izango dira.
