Correoseko garbiketako langileek bizi duten egoera salatu dute
Bost hilabete daramatzate kobratu gabe, eta urriaren 2an greba mugagabera jo zuten. Egoera jasanezina bihurtzen ari da langileentzat, eta erantzunak nahi dituzte.
Correoseko garbiketako langileek urriaren 2tik daramate greba mugagabean, bost hilabete daramatzatelako kobratu gabe. Egoera jasanezina bihurtzen ari da, eta gaur kalera irten dira beren egoera ezagutarazteko eta salatzeko. Oreretako Asanblada Feministaren, Itaiaren eta zenbait herritarren babesa izan dute.
Langileek arazoaren muinera jo dute egungo egoera kokatzeko. Iazko abenduaren 15ean J Cordoba enpresa kontratatu zuen Correosek, eta garbiketako langileak subrogatu zituen. Hasieratik ikusi zuten enpresa hori ez zela “fidagarria”, ohartu baitziren dirua zor zietela urtebetez Elxeko (Alacant) langileei.
Hala ere, Correosek J Cordoba enpresa kontratatu zuen, eta langileek arrazoiak eman dituzte: “Oso lizitazio baxua jarri zuten, eta ez zen beste enpresarik aurkeztu. Horregatik sartu zen J Cordoba enpresa. Ez zituen lizitazioan sartzeko oinarrizkoak bermatzen, baina aurkeztu zen bakarra zenez, hura kontratatu zuten”.
Hortik aurrera hasi zen langileen amesgaiztoa. Abenduaren 15etik “gaizki” ordaintzen hasi ziren: nominak gaizki, atzerapenak ordainketetan… baina enpresa berria zenez, pasatzen utzi zuten. Ekaina izan zen kobratu zuten azken hilabetea, baina hil horretako aparteko ordainsaria ez zuten jaso. Hortik aurrera ez dute ezer kobratu.
Uztailean, abuztuan eta irailean kobratu gabe egin zuten lan, eta urriaren 2an hasi zuten greba mugagabea. Hilabete eta erdi daramate lan egin gabe, bost hilabete kobratu gabe, eta seigarrenaren bidean doaz. Egoera hori ez da soilik Euskal Herrian gertatzen ari; orotara estatu osoko 1.000 langile ingururi eragiten die.
Hori gutxi balitz, enpresarengandik berririk ez dutela salatu dute: “Ez digute ezer esaten. Correosen erantzuna da bilerak egiten ari direla, baina gezurra da. Ez gaituzte informatzen, ez dakigu zein egoeratan gauden. Duda asko ditugu. Ez dakigu zer pasako den gurekin, ez dakigu beste enpresa bat kontratatuko duten”.
Horrez gain, langileak kontziente dira ezinezkoa dela zor bat asumituko duen enpresa bat sartzea: “Beharbada bi hilabete asumi ditzake enpresa batek, baina ezinezkoa da zor guztia asumitzea, eta Correosek ez du ordaindu nahi”.
Correosek zer pentsatzen duen ez dakitela esan dute langileek, baina plantillan nahi ez dituztela salatu dute: “Ez dugu esaten funtzionario bezala jartzea, baina behintzat sortu duten zorra asumi dezaten nahi dugu. Egoera hau geratzea zegoen”.
Bizi duten egoeraren aurrean greba mugagabean jarraituko dutela esan dute, eta nominak ordaintzea lortu arte eta ez ordaintze horiek ez errepikatzeko neurriak hartu arte geldituko ez direla jakinarazi dute.
