Herri Arte Eskolako ikasleak gogotik ariko dira Santa Zezilia Egunean
Ekitaldi nagusia Lekuona Fabrikan izango da 19:30ean; horrekin batera kalean ariko dira musika emanaldiak eskaintzen, baita erretiratuen elkarteetan ere.
Herri Arte Eskolako musika ikasleen artxiboko irudia. Argazkia: Herri Arte Eskola. Santa Zezilia eguna izango da asteazkenean, musikarien eguna, eta Herri Arte Eskolako musika diziplina ezberdinetako ikasleek ez diote hutsik egingo hitzorduari. Musika nonahi herritarren gozamenerako.
Ekitaldi nagusia, Lekuona Fabrikan izango da , 19:30ean. Orkestra sinfonikoa, banda, eta herri musika instrumentuen talde handia ariko da eta bertan. Dantzariek ere bat egingo dute ikuskizun biribila eskaintzeko bertaratzen direnei. Ikuskizunerako gonbidapenak ezinbesteko dira, eta horiek Herri Arte Eskolako harrera bulegoan eskatu behar dira.
Ez da baina Lekuona Fabrikakoa musikari lotuta egingo duten ekintza bakarra Santa Zezilia Egunean; 17:00etatik aurrera kalejirak egingo dituzte han-hemenka Erdialdeko kaleetan. Gainera, piano, biolin, gitarra eta hainbat instrumentuetako ikasle helduek hainbat emanaldia egingo dituzte herriko hainbat erretiratuen elkarteetan. Honakoak dira: Olibeten 18:00etan; Pontikan 18:30ean; Galtzarabordan 18:30ean; eta azkenik, Gabierrotan 19:30ean.
Herri Arte Eskolak jakinarazi du, bestalde, 4-7 urte artekoen hastapen artistiko multidiziplinarreko, dantzako, antzerkiko, eta arte plastikoko saioak normaltasun osoz mantenduko direla, “musika arloko klase batzuei baino ez die eragingo aldaketak”.
