[Argazkiak] Lehenengo 700ekoa, egina
Xoxolurrek bere zazpigarren urteurreneko egitasmo bereziaren lehen irteera egin zuen atzo. Abenduaren 3rako handia prestatzen ari dira.
Lezoko mendizaleak, atzo. Zazpi urte beteko ditu abian den ikasturtean Xoxolur Lezoko Mendi Klubak. Horren harira, egitasmo berezia prestatu dute 2023 eta 2024 artean egingo dituztenak ezaugarritzeko: Euskal Herriko zazpi herrialdeetako beste hainbeste gailur zapalduko dituzte, denak 700 metro ingurukoak. Lehenari atzo (igandea) eutsi zioten, Bizkaian, Astitxiki gailurra bere egin zutelako.
Atxartetik atera ziren irteerarekin bat egin zuten hamasei lezoarrak. Astitxikiko paraje zoragarria zapaldu eta ezagutu ondoren, Axpe herrira jaitsi, eta hango frontoian bazkaldu eta jolasean aritu ziren, tartean pilotara.
Hurrengo irteera Euskararen Egunarekin egingo dute, abenduaren 3an, Jaizkibeldik. Handia prestatzen ari dira. Baina horren berri aurrerago emango dute.
Jarraian, atzoko hainbat argazki, Xoxolurrekoek HITZAra bidalitakoak.
