Zuzenketa partzialak aurkeztu dizkio EAJk aurrekontu proiektuari
600.000 eurotik gorakoak dira alderdi jeltzaleak proposatutako zuzenketa partzialak.
Elixabete Murua eta Luis Mari Oiarbide gaurko agerraldian. Aurrekontu proiektuari aurkeztu dizkion zuzenketa partzialak aurkeztu ditu gaur EAJk prentsaurrekoan. Elixabete Murua eledunak eman ditu xehetasunak. Egindako zuzenketek, 600.000 eurotik gorakoak dira eta “apustu garbia” egiten dutela gizarte politikak indartu, herritarren zerbitzura den hirigintza bultzatu, tokiko merkataritza sustatu, euskara, mugikortasuna, segurtasuna eta gazteria sustatzeko azaldu du jeltzaleak.
Proiektuaren alderdi “ahulenak” zuzentzea dutela helburu esan du jeltzaleak, “udal baliabideak errenteriarren eguneroko jarduna hobetuko duten proiektuetara bideratuz. Hainbat arlotan, hala nola, gizarte politiketan, hirigintza inklusiboan, saltoki txikien suspertzean, mugikortasunean, segurtasunean eta berdintasunean, euskara eta gazterian, dira zuzenketak”.
Aurrekontu proiektua lantzeko “zailtasunak” izan dituztela salatu du, bestalde Muruak, “izan ere aurrekontu proiektuan, agintaldi plana aipatzen da behin eta berriz, behar adina aurrerapenaz jaso ez dugun plana, alegia”. Horrek asko zaildu duela partida bakoitzaren azterketa zehatza egitea erantsi du.
Zuzenketa partzial horiek, gobernu taldeak “bere egiteko modukoak” direla sinistuta azaldu da EAJren bozeramailea. Zuzenketek “paustu sendoa” egiten dute Muruaren iritziz “gizarte politikak indartzearen alde, herritarren zerbitzura dagoen hirigintzaren alde, tokiko merkataritza, euskara, mugikortasuna, segurtasuna eta gazteria bultzatzearen alde”.
Zuzenketetako batzuk aipatu ditu ondoren. Hala, hirigintza inklusiboan, edukiontzi inklusiboak jartzeko 200.000 euroko diru zatia, eta auzoz auzokako diagnostikoa egiteko 50.000 euroko diru zatia aurreikusi ditu EAJk.
Berdintasun arloan, berriz, 50.000 euroko diru zatia proposatu du Errenteria-Oreretako puntu ilunak eguneratu eta esku hartzeko. Gizarte Zerbitzuen atalean ere zuzenketak: Euskadi Lagunkoia programa sustatzeko 40.000 diru zatia; erretiratuen klubetara bideratutako diru zatia 90.000 euroraino handitzea; eta osasunaren sustapena eta adikzioen prebentzio plana egiteko 20.000 euroko diru zatia bideratzea.
Garapen ekonomikoarekin lotuta, online salmentarako plataforma garatzea proposatu du, Errenteria-Oreretako dendentzat (60.000 euro). Kulturan, berriz, Landarbasori diru laguntza 20.000 euroraino handitzea (16.000 euro jasoko ditu aurrekontu proiektuaren arabera). Trafikoa eta segurtasunarekin lotuta, alfaltatze diru zatia 40.500 euro gehitzea jaso du EAJk zuzenketetan.
Beste hiru proposamenen berri eman du azkenik: Gazteen emantzipaziorako udal baliabideen azterketa egitera 35.000 euro bideratzea; online euskaltegia martxan jartzeko 50.000 euro, eta bizikleta elektrikoak alokatzeko sistema abian jartzeko 90.000 euroko diru zatia bideratzea.
