Meipiko haur parkea zaharberritu du udalak
Donibaneko auzoan kokatuta dagoen parkean kautxuzko lur homologatua eta bi plazako zabu moduluak ezarri dituzte. Parkea erabilgarri dago jada.
Pasai Donibaneko Meipi auzoan kokatuta dagoen haur parkea zaharberritu du Pasaiako Udalak berriki. Iragan asteburuan kendu zituzten jolasguneko hesiak, eta jada erabilgarri dago parkea, Pasai Antxoko Biteri plazan berriki inauguratutakoaren gisara.
Meipiko parkea bi eremutan banatua dagoela adierazi du udalak. Kutxabank parekoa “aspaldi” berritu zela zehaztu du udal erakundeak, eta udal gobernuak Zerbitzu Sailari eskaturiko txostenean beste eremuan beste zenbait behar antzeman zituztela baietsi dute.
Parke berrian kautxuzko lur homologatua eta bi plazako zabu modulu berri bat ezarri dituzte udaleko zerbitzuetako langileek. Lanen aurrekontua 8.664,81 eurokoa izan da, BEZ barne.
Antxoko eta Donibaneko parkeetako konponketak egin ondoren, San Pedroko jolasgunean egingo da hurrengo jarduketa. Hainbat gurasok “kezka” azaldu dute bertako lurraren egoeragatik, “haurrentzako arriskutsua” izan daitekeelakoan. Behar horri erantzunez, 8.000 euro inguruko inbertsioa egingo du udalak parkea altxatu eta homologatutako lurzoru berri bat ezartzeko, “istripuak ekiditearren”.
