Aurrekontu proposamenari osoko emendakina aurkeztu dio PSE-EEk
Sozialistek, gainera, hamar emendakin ere aurkeztu dizkiote aurrekontu proposamenari; milioi bat eurokoak dira emendakin horiek.
Alderdi sozialistak osoko emendakina aurkeztu dio gobernu taldearen aurrekontu proposamenari, “proposamen alternatiboa eskainiz”. Horrekin batera, zatikako hamar emendakin ere aurkeztu dizkio proiektuari, milioi bat euroko balioa dutenak, “helburua gobernu taldeak aurkeztutako aurrekontu proiektua nabarmen hoebetzea da”.
Salaketarako tartea ere hartu dute sozialistek. Haien esanetan, “oztopoak” izan dituzte aurrekontuak lantzeko garaian, “aurrekontu proiektua haiek azaltzeko egindako bilera baino ordu batzuk aurretik jaso genituen, eta horrek asko zaildu du lasaitasunez aztertzeko aukera izatea. Gaur gaurkoz, gainera, asteartean jasoko genuela esan baziguten ere, agintaldi planik ez dugu jaso. agintaldi osorako udalak duen planifikazioa ezagutu gabe landu ditugu beraz, 2024rako kontuak”.
Osoko emendakina gobernu taldearen aurrekontu proiektuaren “anbizio faltari” erantzuten dio PSE-EEren hitzetan, “zoritxarrez diru sarrera fikziozkoak azaltzen dira. Horrek kudeaketa eskasa eta bukatuak behar zuten proiektu ugariren gelditzea jarri ditu agerian: Barandiaran parkea, Arramendi parkea, Aldakoenea, Gabierrota pasealekua, adinekoei begirako etxebizitza dotazionalak, Gaztañoko igogailua, hiltegiaren berritzea… kasu”.
Ondoren, aurkeztu dituen emendakinen berri eman du, “guztiak udalerriaren garapenerako eta ongizaterako gako direnak”.
Auzoen hobekuntzarekin lotutakoa da lehenengo emendakina: Galtzarabordako Plaza biziberritzea, kaputxinoak auzoko Sorgintxuloko dorreetako terraza eta bajoen berritzea, Mikel Odriozola estadioaren aldagela eta harmailen berritzea, , Agustinetako Txillida parkea berritzea, eta Gabierrotako Evaristo Bouzas plaza estaltzeko proiektua proposatu ditu PSE-EEk.
Garapen ekonomikoari eta komertzioari begira, plataforma bat sortzea planteatu du alderdi sozialistak, eta diru laguntza lerroa sortzea ekintzailetza sustatzeko.
Iraunkortasuna eta mugikortasunari begira, berriz, Errenteriako eraztun berdearen sorrera planteatu du, bizikleta partekatuen proiektua, eta estalitako bizikleta aparkalekuak. Igogailuak ere proposatu ditu Pontika eta Igantzi artean, eta Jaizkibel hiribidea eta Galtzaraborda etorbidea lotzeko. Azkenik, arlo horretan, Erramun Astibian disuasio-aparkalekua proposatu du.
Haurrei begira ere egin ditu proposamenak PSE-EEk. Hala, Familia Gunea programa Aldakoenea eraikinera zabaltzea eskatu dute, eta Gernika Plazako haur parkea estaltzeko proiektua proposatu du.
Lekuona Fabrikaren programazioa ugaritzeko ere eskatu du alderdi sozialistak, baita madalenetako egitaraua ere. Kultura bonoa martxan jartzea ere eskatu du.
Berdintasun politiken arloan ere proposamenak egin ditu. Puntu ilunen gaineko azterketa, eta sexu heziketa lantzeko programa, eta ziurra izango den ingurune digitala ere eskatu du. Azkenik, elkarteak laguntzea ere txertatu du bere emendakinetan. Hala, Gurutze Gorria eta Landarbaso abesbatzaren diru laguntzak handitzea eskatu du, “egiten duten lan handia babesteko”.