[Bideoak eta argazkiak] Zaintza iraultzeko nahia, Pasaian
Euripean, mobilizazio jendetsuak egin dituzte Antxon eta San Pedron Greba Feminista Orokorraren harira.
Antxon eta San Pedron egin zituzten atzoko Greba Feminista Orokorreko Pasaiako mobilizazio nagusiak. Euripean, goizeko informazio piketeek nahiz kalejirek eguerdiko mobilizazioei leku eman zieten. Antxokoa bereziki handia izan zen: bertan, adinekoen egoitzan, anbulatorioan eta Gure Zumardiaren inguruan geldialdiak egin zituzten, zaintzan lanean ari zirenei aitortza egin eta elkartasuna adierazteko. San Pedron, adinekoen egoitza egin zuten geldialdia.
Bazkalostean mahai-ingurua egin zuten Antxoko Biteri plazako karpan. Ondoren, bai Antxoko zen San Pedroko zutabeak Errenteria-Oreretako eskualdeko manifestaziora joan ziren.
Euskal Herriko Mugimendu Feministak deitutako mobilizazio egunean, Euskal Herriko «zaintza erregimena erabat asistentzialista eta familista» dela aldarrikatzeko izan zen. «Sinetsarazi digute familiak eta zehazki emakumeak direla zaintza lan horiek egin behar dituztenak». Esan dutenez, zaintza beharrak asetzeko gizarte zerbitzu publikoak «oso murritzak» dira, eta zerbitzu gutxi horiek pribatizatzen ari dira. «Zaintza negozio bilakatu dute; azpikontratazioen bidez merkatu pribatuaren esku utzi dute, eta zerbitzuen langileon lan baldintzak prekarizatu dituzte». Greba orokorra «ezeren amaiera ez» dela gaineratu dute, eta lanean jarraituko dutela hitzeman dute «euskal zaintza sistema publiko-komunitarioa» lortu arte.
Ondokoak bai Antxoko zein San Pedroko irudi eta bideoak dira, bi barrutietako mugimendu feministetako kideek HITZAra bidaliak.
