Inkesta, mugikortasunaren gaineko iritziak jasotzeko
Udalak herritarren mugikortasun ohiturak ezagutu, eta garraioarekin nahiz mugikortasunarekin harremana duten zerbitzu eta azpiegituren gaineko iritziak bildu nahi ditu.
Beraungo igogailu berriak. Errenteriako Udalak herritarren mugikortasun ohiturak ezagutu, eta garraioarekin nahiz mugikortasunarekin harremana duten zerbitzu eta azpiegituren gaineko iritziak bildu nahi ditu. Horretarako, inkesta bat betetzeko eskatu die herritarrei. Udalaren webgunearen bitartez eman ditzakete argibideak errenteriarrek. Bertan, inkestaz gain, baliagarri izan daitezkeen hainbat dokumentu erantsi irakur daitezke. Hilaren 22ra arteko epean izango da erabilgarri informazio bilketarako euskarria.
Bildutako informazioak Errenteriako Hiri Mugikortasun Jasangarriaren Plana osatzeko balioko du. Plan horretan arloko bost urteko ibilbidea jasoko dute, eta aldi berean, Hiri Antolamendurako Plan Orokorraren (HAPO) berrikuspenerako baliagarri izango dira.
Informazioa jaso bakarrik ez. Argibideak ere emango ditu udalak. Horregatik, hilaren 14rako (osteguna) batzar irekira deitu ditu herritarrak (18:00etan, udaletxeko areto nagusian), mugikortasun alorrean orain arte egindako bidearen berri eman eta zalantzak argitzeko.
