Hildako palestinarren kontagailua txikitu dute
Orereta Palestinarekin herri dinamikak jarri zuen kontagailu hori. Gaur goizean txikituta azaldu da Pablo Iglesias kaleko edukiontzien ondoan.
Pareta horretan zegoen jarrita kontagailua. Orereta Palestinarekin Herri dinamikak salatu egin du Herriko Plazarako maldan jarri zuen kontagailua txikitu dutela. Kontagailu horrek Israelgo Estatuak urriaren 7az geroztik Gazako zerrendan zein Palestinako beste eremuetan hil dituen palestinar kopurua azaltzen zuen, eta astero eguneratzen zuten. Halaber, Israelgo Estatuak hildako haurren izen abizenak jasota zeuden kontagailu horretan, ez guztiak, egunetik egunera handitzen jarraitzen duelako tamalez, izen zerrenda horrek.
Gaur goizean zenbatekoa eguneratzera gerturatu direnean ohartu dira kontadorea ez zegoela bere lekuan, kendu egin duela norbaitek. Handik gertu, Pablo Iglesias kaleko edukiontzien ondoan aurkitu dute, erabat txikituta.
“Adierazpen askatasunaren” aurkako jo du gertaera eta gogor salatu.
Orereta Palestinarekin Herri dinamikak salatu duenez, ez da izan Palestinaren aurkako genozidioa salatzeko egindakoen kontrako eraso bakarra. Beraun auzoan, paneletan Palestinaren alde egindako pintaketak ezabatu, eta Israelgo Estatuaren aldekoak azaldu dira azken egunetan ere.
Herri dinamikak jakinarazi du, lanean ari dela jada, txikitu duten kontagailua ordezteko, eta lanean jarraituko duela Palestinako herriaren kontrako genozidioa ikusarazten segitzeko. Ildo horretan, herri dinamikarekin bat egin nahi duen herritar orori dei egin dio taldera batzeko. Hurrengo bilera, Gaztaño auzoko Bukagaitz elkartean egingo du datorren asteartean, 19:30ean hasita.
Azkenik, gogora ekarri du, gaur gaurkoz, 15.840 direla Israelgo Estatuak Gazako zerrendan hil dituen palestinarrak.
