2023ari 'agur' esateko eta 2024ari 'kaixo', ia 30 ekitaldi
Eguberrietako egitaraua aurkeztu du gaur udalak. Bertan ohiko osagaiak daude, tartean Euskal Liburu eta Disko Azoka.
Xanti Val Kultura teknikaria eta Mikel Arruti alkatea, egiatarauaren berri ematen. Oparo datoz bizi dugun urtearen bukaera eta 2024aren hasiera Lezon. Osotara, herrian gelditzeko 30 arrazoi inguru landu dituzte herriko eragileek eta udalak. Herritar orori daude zuzenduta, haien adina edozein dela ere. Horien denen berri emateko herriko postontzi guztietan egitaraua utziko du udalak. Baten batek lasterbidea nahiko balu, klik egin hemen (PDF artxiboa jaitsiko da). Abendu osoan eta urtarrilaren hasieran bada zer egin herrian.
Klasiko asko Lezoko Eguberrietarako: hilaren 17an, San Tomas; 15etik 22ra Euskal Liburu eta Disko Azoka; hilaren 24 eta 25ean Olentzero eta Mari Domingirekin lotutako jarduerak; urtarrilaren 5eko eguerdian, beti bezala, Pirritx, Porrotx eta Marimotots pailazoen emanaldia (datozen egunetan jakinaraziko dute sarrerak nola eskuratu).
Horien guztien berri eman dute gaur Mikel Arruti alkateak eta Xanti Val Kultura zinegotziak. Aipatu dute urtero errepikatzen diren ekitaldi horiez gain, beste asko daudela. Esan bezala, horien berri izango dute lezoar denek etxean jasoko dute esku orriaren bidez. Udalaren webgunetik ere lor daiteke informazio hori.
Azokarako, Literatur Bonoak
Hilaren 15etik 22ra jasoko du, urtero bezala, herriko Kultura Aretoak Eguberrietako Euskal Liburu eta Disko Azoka. Bertan erosketak sustatzeko Literatur Bonoa izango dute eskuragarri nahi duten guztiek. Horrela, 20 euroko gutxieneko erosketa egiteagatik, sei euroko opari bonua eskuratuko dute erosleek. “Helburua, euskaraz idatzitako literatura eta pentsamendu argitalpenak sustatzea izango da”, esan dute udaletik.
