Valeriano Lecetaren horma irudia zaharberritu dute
Datorren urtean obra sortu zeneko 50. urteurrena beteko da, eta efemeridea baliatuta, udalak hainbat zaintza lan egin ditu.
Errenteriako udalak Osoko Bilkuren Aretoko horma-irudia berritzea erabaki du. Valeriano Lecetarena da, eta datorren urtean, 2024ean, 50 urte beteko ditu. Hori dela eta hartu dute erabakia, efemeridea ospatzeko.
Taula gaineko olio pinturaz sortu zuen. 6×3 metro inguru ditu, eta obrak Errenteria-Oreretako garai historikoen alegoria islatzen du. Lecetak horma-irudia 1974ean bukatu bazuen ere, 1998an koloreen tonalitatea eta zenbait zati egokitu zituen autoreak berak.
Kenia Oteiza Restaura (KOR) enpresari egokitu diote lana, eta enpresa horrek hartu zuen muralaren egoera eta egokitasuna aztertzeko ardura. Ahal bezain zaharberritze gutxien egin dituzte, eta horiek denak itzulgarri zein bereizgarriak direla azpimarratu.
Zaintza lanek bi aste iraun dituzte. Gainazala garbitu da (modu neutroan), berniza kendu gabe. Orban gorriak kendu dituzte gainera, eta hutsuneak berrezarri.
