Albaolak izarrei begira jarriko ditu haurrak
Albaolak 6-8 urte bitarteko haurrei begirako tailer bat ondu du hilaren 17rako, izarrak ardatz dituena. Izen-emateak irekita daude, 5 euroko prezioan.
'Izarrek esaten digutena' tailerra hilaren 17an egingo da. Albaola Itsas Kultur Faktoriak 6-8 urte bitarteko haurrei begirako tailer bat ondu du hilaren 17rako. Izarrek esaten digutena lelopean, tailer horretan izar garrantzitsuak zein diren ikasiko dute parte hartzaileek. Horrez gain, Eguberriak datozela ospatzeko, norberak bere izarra margotuko duela aurreratu dute.
Ikastaroa hilaren 17an izango da, 10:30etik 12:00etara, Albaolaren egoitzan, euskaraz. Izen-emateek 5 euroko prezioa dute, eta bi modutara egin daitezke: 943 39 24 26 telefonora deituta edo posta elektroniko bidez.
