Pasaiako PSE-EEk osoko zuzenketa egin dio aurrekontu proiektuari
Alderdi sozialistak nabarmendu du aurrekontu horrek ez dituela kontuan hartzen udalerriaren egiturazko arazoak, eta alkateak aipatutako aurrekontu gehikuntza Andoaneagiko obretarako diru laguntzaren ondorio dela.
Pasaiako PSE-EEk osoko zuzenketa aurkeztu dio EH Bilduk eta Podemosek osatutako udal gobernu taldeak egindako aurrekontu proiektuari. Alderdi sozialistak adierazi du “aurrekontu horrek ez dituela kontuan hartzen udalerriaren egitura arazoak, ez diela aurre egiten Pasaiak dituen erronkei, eta ez dituela kontuan hartzen pasaitarren beharrak”.
Horrez gain, alkateak erakutsitako “triunfalismoaren” aurrean, Pasaiako historiako aurrekonturik altuena dela esanez, PSE-EEk nabarmendu du Andonaegi berritzeko Eusko Jaurlaritzak emandako diru laguntzatik zortzi milioi kentzen badira, “2024rako aurrekontua 2023koaren antzekoa” dela. Andonaegiko obrak PSE-EE buru zuen aurreko udal gobernutik datozela zehaztu dute.
Zuzenketa partzialei dagokionean, alderdi sozialistak hainbat arlo azpimarratu ditu, bereziki hiri berrikuntzari, irisgarritasunari eta mugikortasunari, kulturari, zahar etxeei, enpleguari eta gizarte politikei buruzkoak. Orotara, 34 zuzenketa partzial aurkeztu ditu alderdi sozialistak, “aurkeztutako aurrekontua hainbat arlotan hobetu daitekeela aintzat hartuta”.
Hiri-berrikuntzaren arloan, sozialistek 234.000 euro inguru bideratzea eskatu dute, besteak beste, honakoetara: kaleen zoladura, lorezaintza eta zebrabide adimendunen egokitzapena. Era berean, Donibaneko Bordalaborda auzoan bigarren igogailu bat jartzea eskatu dute. Horretarako, 300.000 eurotik gorako partida bat sortzea proposatu dute.
Pasaiako Udal Talde Sozialistak “beharrezkotzat” jo du kultura eta kirol entitateentzako diru laguntzak handitzea, eta 300.000 euro inguru eskatu ditu atal horretarako. Halaber, Itsas Festibala egiteko edo Eskola Nautikoaren planetarioa berreskuratzeko ekarpenak egin dituela gogorarazi dute.
PSE-EEk, gainera, partida bat eskatu du Pasai San Pedroko zahar etxearen birgaitzeari aurre egiteko, eta beste bat komun autogarbitzaileak ezartzen jarraitzeko.
Azkenik, sozialisten ustez “beharrezkoa” da udal aurrekontuetan “aipamen berezia” egitea tokiko ekonomiaren hobekuntzari heltzeko eta hura sustatzeko esku hartzeei. Horretarako, jarduera ekonomikoa eta enplegua 100.000 euro ingururen truke sustatzeko zuzenketak proposatu dituzte. Era berean, gizarte larrialdiari aurre egiteko gastuak handitzea proposatu dute, ia milioi euroraino.
Zuzenketen helburua
PSE-EEren zuzenketa horien helburua da “aurrekontua pasaitarrek dituzten benetako arazoetara hurbiltzea, eta ez EH Bilduren eta Podemosen gobernu taldearen aurrekontu proiektuak erakusten dituen mamuetara eta identitate asmoetara”.
Beste behin ere, “herritarrei entzuteko” dagoela dioen udal gobernu horrek hori egiten ez duela gaineratu dute. “Herritarrei entzun izan baliete, beste aurrekontu proiektu bat aurkeztuko zuketen”, esan dute.
