San Pedroko itsasargira bideko mendi magala egonkortzen ari dira
Eremu horretan segurtasun neurriak bermatu nahi dira, herritarren pasealekurako gune irisgarria izan dadin. Lanak urtarrilaren erdialderako bukatzea aurreikusi dute.
San Pedroko itsasargira bideko mendi magalean egonkortze lanak egiten ari da Pasaiako Udala azaro hasieratik. Eremu horretan segurtasun neurriak bermatu nahi dira, herritarren pasealekurako gune irisgarria izan dadin.
Udala gauzatzen ari den obra luizien ondorioz eroritako ezpondaren goialdea horma ainguratu baten bidez egonkortzean datza. Horrez gain, hegalaren gainerako zatia ere egonkortu du obrak egiten ari den enpresa arduradunak. Bigarren jarduketa horretarako, sistema malgu bat baliatuko dute muga elastiko altuko altzairuzko sare batez, kableez eta buloiez osaturikoa.
Jarduketen eremuan luizi arriskua dago, eta horrek bideari eragin izan dio behin baino gehiagotan. Pasealekua segurua izan dadin, egonkortze lanak kontratatu ditu udalak.
Lanen aurrekontua 247.533,05 eurokoa da (BEZ barne), eta egikaritze epea, hamar astekoa. Lanak, hortaz, urtarrilaren erdialderako bukatzea aurreikusi dute. Udalak adierazi du azken egunetako baldintza meteorologikoek eragina izan dutela jarduketetan, eta litekeena dela atzerapenen bat eragitea langileen ohiko jardunean.
