Iztietako anbulatorioan oinarrizko arreta falta dagoela salatu dute
Larunbatean, 12:00etan Iztietako anbulatorioan kontzentrazioa egingo dute Duintasunak deituta. Anbulatorioan ez omen dago pertsonal nahikoa.
Iztietako anbulatorioaren aurrean kalitatezko oinarrizko arreta duinaren alde. Gaur, astelehena, Duintasunak kalera deitu ditu pentsiodunak. Hilabeteko lehen astelehenetan izaten dute hitzordua kalera irteteko; oraingoan, zubia dela eta, hileko bigarren astelehenean atera dira. Hilabetero-hilabetero bezala, 11:00etan bildu dira Herriko Plazan, eta bertatik abiatuta eman diote hasiera manifestazioari. Herriko kaleetatik barrera ibili dira, pentsio publiko duinen alde protestan, minimoa 1.080 eurokoa izan dadin gutxienez.
Amaiera tokia ezberdina izan da gaurkoa, ezohikoa. Iztietako anbulatorioan agerraldi batekin amaitu baitute. Bertan Duintasunak, herriko auzo elkarteetako ordezkariak (Oiarso Erdigunea, Alaberga, Kaputxinoak, Beraun, Galtzaraborda, Agustinak, Gaztaño eta Iztieta), jubilatu elkarteetako ordezkariak, erretiratuen etxeak (Galtzaraborda, Beraun, Kaputxinoak), Asanblada Feministako kideak, Bilgune Feministako kideak, Oarso Taldeak eta GOT taldeko ordezkariak parte hartu dute. Duintasunako bozeramaileak, Javier Sanzek, eman ditu anbulatorio aurrean azalpenak.
Iztietako Anbulatorioan Oinarrizko Osasun Laguntzaren eta EAG Larrialdien egoera larria salatuz amaitu dute gaurko kontzentrazioa, Iztietako anbulatorioan. Errenteria-Orereta, Lezo, Oiartzun eta Pasaian “kezka” eta “ezinegona” sortzen du anbulatorio horren egoerak. Sanzek irakurritako manifestuan, oinarrizko arretan anbulatorioak 16 mediku dituela esleituta adierazi du: “Horietatik bi erretiratu egin dira, eta beste bost bajan daude”. Egoera honen aurrean, 65.000 biztanleko eskualdea izanik, Donostiako Larrialdietako Zerbitzuetara jo behar izaten omen dute eriek.
Era honetan, medikuek agendak “gainezka” dituzte. Hala ere, “babesa, elkartasuna eta errespetua” erakutsi nahi dizkiete bertan lanean ari diren profesionalei. “Ez dugu ahaztu behar jaiotzen garenetik gure azken egunera arte zaintzen gaituzten pertsonak direla, hau da, kideak”. Horregatik, ez diete haiei leporatzen erantzukizuna. Gainera, oro har, Sanzek adierazi du langileak ordu gehiago sartzen dituztela lanean pazienteak artatzeko. “Erantzukizuna Eusko Jaurlaritzarena da, ezin gara gure profesionalekin gatazkaren trapan erori”.
Hori guztiagatik, “haserrea erakusteko eta anbulatorioan bizi dugun egoera salatzeko”, abenduaren 16an, larunbatean, 12:00etan gaur amaitu duten leku berean hitzartuko dira, Iztietako anbulatorioan.”Ez ditu mobilizazioak etengo egoera konpondu arte. Gure osasunagatik, murrizketarik ez”.
