Haritz Mujika kargugabetu du Amorebietak
Taldearen sailkapen egoera dela eta hartu du erabakia talde zornotzarrak. 19 jardunaldi jokatuta, Amorebieta sailkapeneko azken aurreko postuan da, salbaziotik 6 puntura.
Argazkia: Amorebieta. Amorebietak Haritz Mujika antxotarra kargugabetu du entrenatzaile postutik. 19 jardunaldi jokatuta, zornotzarrak Bigarren Mailako sailkapeneko azken aurreko postuan dira, 14 punturekin. Une honetan, jaitsiera postuetan dira, eta 6 puntutara dute salbazioa. Talde bizkaitarrak plazaratutako oharraren arabera, Mujika kargugabetzeko erabakia “mingarria” izan da, “taldearen sailkapen egoera” dela eta hartutakoa, “ligako txapelketan norabidea zuzentzen lagunduko duelakoan”.
Mujika Amorebietan erretiratu zen futbolari gisa, eta 2019-2020 denboraldian taldeko bigarren entrenatzaile kargua hartu zuen, Iñigo Velezen laguntzaile izateko. 2020-2021 sasoian, Bigarren Mailarako igoera lortu zuten zornotzarrek denboraldi bikaina osatu ondoren. Hurrengo urtean, 2021-2022 denboraldian, zornotzarrek ez zuten ibilbide oparoa izan Bigarren Mailan, eta 2022ko martxoan Mujika Amorebietako lehen entrenatzaile izendatu zuten, Velez kargugabetu ondoren.
Mujika ez zen gai izan salbazioa lortzeko, eta maila galdu zuen talde urdinak. Iaz, baina, Lehen Federazioko txapeldun izan ondoren, Amorebieta Bigarren Mailara itzuli zen Mujikarekin. Bigarren Mailan utzi du taldea antxotarrak.
Ligako ibilbidea onena izan ez bada ere, Amorebieta Espainiako Kopako final hamaseirenetan da. Zornotzarrek 0-1 irabazi zioten Levanteri aurreko kanporaketan. Mujika gabe, gaur ezagutuko dute urdinek final hamaseirenetako kanporaketako arerioa.
Amorebietako Zuzendaritza Batzordeak bere “esker ona” adierazi dio Mujikari “urdinen aulkian egindako lanagatik, bere profesionaltasunagatik, dedikazioagatik eta giza balioengatik”. Zornotzan izan den denboran, Mujikak “bi igoera historiko” lortu dituela gogorarazi du klubak, 2020-2021 eta 2022-2023 sasoietan.
Amorebietak “arrakasta handienak eta zorterik onena” opa dizkio antxotarrari, “bai etorkizun profesionalean, bai arlo pertsonalean”.
