Donibane 70. zenbakiko udal eraikina konpontzen ari dira
Eraikin horren estalkia egoera ezegonkorrean dagoenez, teilatua konpontzen hasi zen udala astelehenean. Lanen helburua da bizilagunen segurtasuna bermatzea.
Astelehenean Donibane 70. zenbakiko udal eraikineko teilatua konpontzen hasi zen Pasaiako Udala. Udal erakundeak adierazi du, gutxienez, 2016tik dagoela estalkia “egoera ezegonkorrean”. Hala, ingurutik igarotzen diren oinezko nahiz ibilgailuen segurtasuna bermatze aldera, “lehentasunez” esku hartzea erabaki du udal gobernuak.
Jarduketa horretan eraikineko teilatua osorik aldatuko dela aurreratu du udalak: estalkia nahiz horren egitura. Obren egikaritze epea hiru astekoa izango dela aurreikusi dute udaleko Zerbitzuetako langileek; betiere, eguraldiak lanean jarraitzea ahalbidetzen badu.
Lokalaren azalera 30 metro koadro ingurukoa dela jakinarazi du udalak, eta teilatua aldatzeko aurrekontua 28.000 eurokoa da. Udal erakundeak nabarmendu du ez dela aurreikusten jarduketek trafikoan eragina izatea.
Jarduketen xehetasunei dagokienean, honakoak dira egin beharreko lanak: aldamioa muntatu eta desmuntatzea; hondakinak kentzeko eta materiala igotzeko karga jasogailuak jartzea; teilak eta estalkia kentzea; taula hidrofugo matxinbratua ipintzea; isolatzailea jartzea; teila gorriak ipintzea; eta teilatu hodia jartzea.
