Jendaurrean aurkeztu dute Oarsoaldeko Etxebizitza Sindikatua
Krisi garaietan, etxebizitzak jabe txikientzat duen balioaz eta horien inguruan hartutako neurrien inguruan aritu ziren.
Kontseilu Sozialista Oarsoaldeak otsailean aurkeztu zuen eskualdeko Etxebizitza Sindikatua. Ordutik lanean aritu badira ere, aurkezpen formalei ekin diete. Hala, atzo egin zuten lehena, Reina aretoan. Egungo koiunturaren analisia egin eta etxebizitzaren auziaren inguruan duten ikuspuntua azaldu zuten. Hitzordua lan egiteko moduaz solasteko baliatu zuten ere.
Etxebizitza, “egungo sistema eta testuinguruan merkantzia izaera” duen heinean, askorentzat hartatik eratorritako errenta irabazi iturria dela adierazi zuten. Krisi garaian, horrela, alderdi politiko eta instituzioetatik abian jartzen ari diren neurriek “irabaziak zalantzak jartzetik urrun, irabazi tasei muga bat jartzera mugatzea” izan dutela helburu esan dute. Neurri horiek etxe-jabe eta errentista txikien egoerari mesede egin diela adierazi, eta Isabel Rodriguez Espainiako Gobernuko Etxebizitza ministroaren adibidea aipatu dute: “espainiar estatuan izendatu berri duten etxebizitza ministroa ere etxe jabe txikien eskubideen alde azaldu da bere lehen hitzartzean“.
Honen harira, estatu mailan errentisten bataz besteko urteko diru-sarrerak 40.000 euro ingurukoak zirela adierazi dute, baita 2023ko lehen datuen arabera, erositako etxebizitzen %50aren kasuan hipoteka mailegurik gabe egin zutela ere: “etxebizitza negozio bihurtu dute, norbanako nahiz familia unitateen ezinbesteko garapen integralerako tresna bada ere“. Funtsean, “langileriaren beharretatik lorturiko irabaziak mantendu nahiz hazteko balio izaten” duela ondorioztatu dute.
Bukaeran, Kontseilu Sozialistako kideek autodefentsa antolatzeko espazio moduan aurkeztu dute sindikatua, bizi baldintzak defendatzeaz gain, baldintzok hobetzeko lana burutzeko lanabes gisa.
